Shymkenttikter qaiǵyly oqiǵa saldarynan ajal qushqan Olimpiada júldegeri Denis Tendi Muz saraiynyń aldynda eske aldy, dep habarlaidy QazAqparat tilshisi.
Muz saraiynyń aldyna jinalǵan jurtshylyq Sochi Olimpiadasynyń qola júldegeri Denistiń týǵan-týysqandaryna kóńil aityp, qaiǵylaryna ortaqtastyǵyn bildirdi.
Adamdar esimi álemge tanylǵan Denistiń mezgilsiz ólimi ońtústik jurtshylyǵynyń da qabyrǵasyn qaiystyrǵanyn atap ótti. Qamshynyń sabyndai ǵana qysqa ǵumyrynda juldyzdai jarq etip, nebári 25 jasynda jaryq dúniemen qosh aitysqan sportshynyń jetistikterin eske aldy.
Shymkenttik mánerlep syrǵanaý sportshylary bolsa onymen birge bolǵan, áńgimelesken sátterdi eske aldy. Onyń ósip kele jatqan jas sportshylarǵa úlgi bolǵany aityldy.
Qala turǵyndary eriksiz kózderine jas alyp, onyń jarqyldaǵan beinesi máńgi este qalatynyn bildirdi.
Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
25 jasynda ómiri úzilgen sportshymen qoshtasý rásimi 21 shilde kúni Almatydaǵy Balýan Sholaq atyndaǵy sport saraiynda ótedi. Bastalýy - saǵat 10:00-de.
