Olimpiada oiyndaryna ulttyq komandalardyń daiyndyǵyna 789 mln teńge baǵyttaldy. Bul týraly Beijińdegi Olimpiada oiyndarynyń qorytyndysy boiynsha baspasóz máslihatynda Ulttyq Olimpiada komitetiniń bas hatshysy Andrei Kriýkov aitty, dep habarlaidy QazAqparat.
«Olimpiada oiyndaryna tikelei qatysý turǵysynda 248 mln teńge jumsaldy. Sonyń 107 mln teńgesi «Eir Astana» kompaniiasyna charterlik reisterdi usynǵany úshin tólendi», - dedi Kriýkov Ortalyq kommýnikatsiialar qyzmetinde.
Onyń aitýynsha, Olimpiada oiyndaryna ulttyq komandalardyń daiyndyǵyna 789 mln teńge baǵyttaldy. Osy oraida oqý-jattyǵý jiyny daiyndyǵy men jarystaryna 234 sportshy men bapker qatysty. Bir qatysýshyǵa jumsalǵan qarajattyń ortasha kólemi 15 mln teńge boldy.
Bul rette Kriýkov naqty sport túri boiynsha jyl boiynda qansha qarajat baǵyttalǵanyn naqtylady.
Biatlonǵa – 384 mln teńge, tań shańǵysyna – 100 mln, konki sporty – 400 mln, shańǵy jarysy - 363 mln, kerling – 200 mln, tramplinnen shańǵymen sekirý – 198 mln, snoýbord – 14 mln, konkimen mánerlep syrǵanaý – 143 mln, fristail-mogýl – 562 mln, fristail akrobatika – 319 mln, shaibaly hokkei – 259 mln, short-trekke 392 mln teńge jumsaldy.
«Jalpy, qysqy sport túrlerine biýdjettik qarjylandyrýda 3,5 mlrd teńge qarastyryldy», - dedi ol.
Budan bólek, Ulttyq Olimpiada komiteti osy olimpiadalyq tsiklge tartqan demeýshilik qarajaty aityldy. Osy oraida 2018 jyly – 365 mln teńge, 2019 jyly – 369 mln, 2020 jyly – 500 mln, 2021 jyly 599 mln teńge baǵyttaldy. Jalpy, demeýshiler esebinen sporttyq baǵdarlamany qarjylandyrýǵa 2 mlrd teńgege jýyq tartylǵan.
