Búgin Úkimet otyrysynan keiin elimizdiń Ishki ister ministri Erlan Turǵymbaev Olimpiada chempiony Dmitrii Balandinniń kóliginiń ainasyn urlaý faktisine qatysty pikir bildirdi, dep habarlaidy QazAqparat tilshisi.
«Qylmys álemniń kez kelgen elinde jasalady. Qylmys jasalmaityn birde-bir el joq. Dál sol jerde naqty Olimpiada chempiondaryna qarsy qandai da bir aktsiia júrgizilip jatyr degenge túbegeili qarsymyn. Bul eń aldymen sáikestik. Ol qalanyń ortasy jáne kólik qoiýǵa arnalǵan oryn óte kóp. Beinebaqylaý júiesiniń jáne qyzmetkerlerimizdiń jedel jumysynyń arqasynda atalǵan qylmys bir táýliktiń ishinde ashylyp, qylmysker ustaldy. Menińshe, bul politsiianyń durys ári jaqsy jumysynyń nátijesi», - dedi ministr.
Osy oraida ol elimizdegi kólikterdiń qosalqy bólshekterin satatyn barlyq bazar tekserilip jatqanyn aitty.
«Búgingi kúni kólik ainasyn satatyn búkil jerde reidtik sharalar júrgizip jatyrmyz. Zańsyz jumys istep turǵan bazarlardyń barlyǵy is júzinde jabyldy. Qazirgi ýaqytta zaýyttan shyqqan bólshekter ǵana saýdalanyp jatyr», - dedi ol.
E.Turǵymbaev BAQ ókilderiniń Almatynyń jergilikti politsiia basshysy jazalana ma degen saýalyna da jaýap berdi.
«Ne úshin? Qylmysty bir táýliktiń ishinde ashqany úshin be? Aldyn alý sharalaryn taǵy da qarastyratyn bolamyz», - dedi E.Turǵymbaev.
