Armanshyl aqynǵa turmysqa degen ikemdilik jetispedi, ol ne ózi qatysqan áskeri urystarynan, ne ádebi shyǵarmalarynan eshqandai paida tappady. Onyń mansapqumarlyqtan ada jany ataq pen dańq jinaý jolynda emes, óziniń naǵyz qumarlyǵy jolynda eńbektenýge jetelep turatyn... Ony kórgen adamdar jazýshy janynyń kórkem de erekshe dúnielerge degen es-tússiz ǵashyqtyǵyn baiqaityn. Romantikalyq kóńilge beiim júrek ony birese sary ýaiymǵa salyp, birese tym kóńildi etetin. Ol óziniń qiyn taǵdyrynda batyldyq tanyta bildi, al danyshpandyǵy onyń qarapaiymdylyǵyn óshire almady.
Búgin, 29 qyrkúiek áigili ispan jazýshysy Migel de Servantes Saavedranyń týǵan kúni.
Álem ádebietiniń jaquty “Don Kihot” romanynyń avtory Servantes 1547 jyly Alkala-de-Anares eldi mekeninde qarapaiym kedei otbasynda dúniege kelgen. Keiin Valiadolida qalasyndaǵy iezýitter kollegiiasynda bilim alady. Eýropa flotynyń túriktermen soǵysy kezinde ispan áskeri qatarynda qyzmet etip, urys barysynda sol qolynan aiyrylady. 1575 jyly Otanyna qaityp kele jatqan jolda teńiz qaraqshylarynyń qolyna túsip, Aljirge quldyqqa satylyp ketedi. Tutqynnan 1580 jyly missionerler bosatyp aldy. Áskeri qyzmetten oralǵan soń, kesh bolsa da ádebi shyǵarmalar jazýmen ainalysa bastaidy. Alaida bul mansap eshqandai qarjylyq paida ákelmegendikten, jan baǵý maqsatynda 1587 jyly Seviliaǵa kóshedi. Ol jerdegi portta saýda isimen ainalysyp, birneshe ret túrmege jabyldy.
Servantes tuńǵysh shyǵarmalarynda jastyq shaq pen mahabbat taqyryptaryn qozǵai bastady. 1585 jyly jaryq kórgen “Galateia” pastoraldyq romanynda eki baqtashynyń sulý Galateiaǵa ǵashyq bolýy beineledi. Onyń otyzǵa jýyq dramalyq shyǵarmasy Madrid teatrlarynda sahnalanǵan bolatyn. “Aljir katorgasy” atalatyn pesasy súiispenshilik týraly sóz etse, “Aljir ádet-ǵurpy” shyǵarmasy aljirlik jubailardyń taǵdyryn beineleidi. “Nýmansiia” tragediiasynda Servantes Rim áskeri shabýylyna qarsy tótep bergen ejelgi qala turǵyndarynyń erligin nasihattaǵan. Al, “Naqyl novellalary” povesinde erlik pen mahabbat, ýaqyt, minez máseleleri jaily tolǵanystar, adamgershilik, qaiyrymdylyq taqyryptary qamtylǵan. Onyń “Parnasqa saiahat” poemasy, “Segiz komediia men intermediia” t.b. kóptegen týyndylary bar.
Uly jazýshynyń shyǵarmashylyǵymen tereńirek tanysqyńyz kelse, Á.Bajenovtiń aýdarmasyndaǵy Servantes shyǵarmalarynyń 4 tomdyǵyn oqyńyz. Klassikalyq álem ádebietiniń teńdesiz týyndysyn bilý – ádebietsúier qaýymnyń paryzy.
Servantes bir sózinde "Ómirde ólimnen basqanyń barlyǵyn túzetýge bolady" degen eken. Ol bolsa, ádebiette qaldyrǵan óshpes atymen óz ólimin máńgilik ómirge ózgerte bildi.
Aiymgúl Oralqyzy,
