Oligarh Aleksandr Klebanov ózi baqylaityn Ekibastuz jylý elektr ortalyǵyn memleketke apatty kúiinde 1 teńgege satqysy keledi. Bul týraly Májilis depýtaty Erlan Saiyrov aitty, dep habarlaidy Sputnik Qazaqstan.
Depýtat kúni keshe ǵana Ekibastuz qalasynan oraldy. Májilis kýlýarynda jýrnalister Saiyrovtan "oligarh Klebanovpen kezdestińiz be" dep surady.
"Iá, eki kún buryn ákimshilikte jinalys boldy. Oǵan Klebanov ta qatysty. Sol kezde biz búkil suraqty sol kisige qoidyq. Ol bizge (Ekibastuz JEO-ny) 1 teńgege memleketke satýǵa daiynbyz dedi", - dep toqtaldy Saiyrov Májilis kýlýarynda.
Alaida Qazaqstan biligi oǵan kelispegen.
"Biz olai bolmaidy dep aittyq. Eń aldymen kásiporyndy ielikke alǵan kezde tozý deńgeii qandai, qazir qandai, sol aiyrmany anyqtap, sony tóleýdi talap ettik. Ekinshiden, qazir Qazaqstan halqy qinalyp jatyr. Sondyqtan olar Ekibastuz halqyna moraldyq shyǵyn tóleýi kerek", - dedi májilismen.
Osy oraida BAQ ókilderi Klebanov jylý ortalyǵyn jóndep, halyqqa shyǵyn tóleýge kelisti me dep surady.
"Ol jerde biraz pikirtalas boldy. Sońynda árkim óz pikirinde qaldy. Meniń oiymsha, bul másele Úkimet deńgeiinde sheshiledi. Eger quqyq qorǵaý organdary zańbuzýshylyq tapsa, shyǵyndy óteý týraly másele kóteriledi", - dedi Saiyrov.
27 qarashaǵa qaraǵan túni Ekibastuz JEO-da qazandyqtar isten shyǵyp, turǵyndar qaqaǵan aiazda jylýsyz qaldy. Ertesine qalada tótenshe jaǵdai jariialandy.
Aita keteri, oligarh Aleksandr Klebanov – "Ekibastuzjylýenergiia" JShS quryltaishysy.
