Aqmola oblysy Arshaly aýdanynda turatyn Asylbek Baiajuma esimdi azamat 20 jylǵa jýyq ýaqyt buryn ushty-kúili joǵalyp ketken qaryndasyn áleýmettik jeliniń kómegimen taýyp alǵan. Bul týraly ol QazAqparat tilshisine aityp berdi.
Asylbektiń aitýynsha, onyń týǵan-týystary úidiń kenjesi - Janbotanyń jaryq dúniede bar ekendiginen, onyń tabylatyndyǵynan birjola kúder úzgen. Ózi de aýyq-aýyq eske alyp otyratyny bolmasa, endi ony kóremin dep oilamaǵan. Alaida, kúni keshe 20 jylǵa jýyq ýaqyt buryn aidyń-kúnniń amanynda kóz jazyp qalǵan kenje qaryndasy qońyraý shalyp, «Men Janbotamyn, aǵa, barmyn, tirimin» degende tóbesinen jai túskendei kúi keshken.
Janbota Shaiahmetqyzy 1984 jyly dúniege kelgen eken. 1991 jyly ákesi Shaiahmet Burqanuly Qazaqstanǵa Mońǵoliiadan alǵashqy kóshti bastap keledi. Ol kisiniń úsh joǵary bilimi bar, Mońǵol elinde túrli memlekettik laýazymdy qyzmetter atqarǵan. Anasy Ǵaziza Halhaǵanqyzy joǵary bilimdi dáriger. Ǵaziza men Shaiahmetten 4 bala týady: Jandos, Záýresh, Asylbek jáne Janbota.
1996 jyly sáýir aiynda anasy Ǵaziza Kókshetaý oblysy (sol kezdegi ataý - red.) Volodarovka aýdany Dáýqara aýylynda bas dáriger bolyp júrip, kenet kóz jumady. Odan soń Shaiahmet Burqanuly bala-shaǵasymen Kókshetaý qalasyna kóship kelip Kókshetaý ýniversitetinde, «Alash» qoǵamdyq qozǵalysynyń ortalyq apparatynda jumys isteidi.
2001 jyly 9-synyp bitirgen Janbota Kókshetaýdaǵy qazaq pedagogikalyq kolledjine oqýǵa qujat tapsyrýǵa ketip, sol kúii odan habar bolmaidy. Týǵan-týystary «Barmysyń, baýyrym!», «Jdi menia» syndy kóptegen baǵdarlamalar arqyly, Ishki ister organdary arqyly izdestiredi, biraq esh nátije shyqpaidy. 2-3 jyldan soń ómir aǵymymen izdeý jumystary da saiabyrsi bastaidy. Kele-kele ol tiri degen de úmit úziledi. Alaida, 17 jyldan soń óldige sanalǵan Janbota aǵasyn ózi taýyp alǵan.
«Keshe, iaǵni 1 sáýir kúni anamyz Ǵaziza marqumnyń rýhyna quran baǵyshtap otyrǵan sátte qaryndasymyz habarlasyp, óziniń tiri ekenin, bar ekenin aitty. Aýzyma sóz túspei, ne derimdi bilmei qaldym. 1 sáýirdiń qaljyńy ma dep te oiladym. Alaida qonaqtarym ketken soń sóilese kele onyń bar taǵdyryn bildim», -deidi Asylbek.
Málim bolǵandai, Janbota úiden ketken jolynda bir dos qyzymen Astana qalasyna barady. Jastyqpen «jumysqa turyp, óz betimmen kún kórem» degen sheshim qabyldaidy. Keiin jaqyndary ony izdestire bastaǵanda Almatyǵa qashyp ketedi. Almatyda jol kólik oqiǵasyna ushyrap, 1,5 jyl emdeledi. Sol jyldary qyzdarmen birge avtokólik urlyǵyn jasap, 3 jylǵa sottalyp ketedi.
Túrmeden shyqqan soń Talǵar aýdanynda bir qoishy jigitke turmysqa shyǵyp, 2,5 jyldan soń ortaq bala bolmaǵandyqtan ajyrasady. Osydan soń óz ómirin qolǵa alyp, jamanshylyqqa uryndyrǵan ortadan alystaidy. Osynsha oqiǵany bastan keshken ol aǵalaryn izdep barýǵa dáti barmaidy.
Qazirgi ýaqytta Janbota Almaty qalasynda jumys isteidi eken. Birer kún buryn áleýmettik jelide otyryp, oida-joqta naǵashy ápkesiniń paraqshasyn taýyp alady. Sodan barlyq týystarynyń nomerlerin alyp, habarlasa bastaidy. Aqyry marqum anasynyń ómirge kelgen kúninde aǵasymen tildesedi.
Bizdiń keiipker aty-jónin Janna Shaiahmetova dep ózgertip alǵan kórinedi. Sol sebepti ishki ister organdarynyń izdeý jumystary nátije bermegen.
Jaqyn kúnderi 20 jylǵa jýyq bir-birin kórmegen aǵaly-qaryndasty ekeý kezdespek...
