Foto: Májilistiń baspasóz qyzmeti
Májilis depýtaty Nartai Aralbaiuly taksi júrgizýshileriniń máselesin kóterdi, dep habarlaidy Ult.kz, Massaget.kzke silteme jasap.
Depýtat qai zań jobasyna qarsy?
Májilismen Nartai Sársenǵaliev taksi men avtobýs júrgizýshileriniń máselesin kóterip, premer-ministriniń birinshi orynbasary Roman Skliarǵa saýal joldady. Onyń sózinshe, táýlik boiy tynym tappai jolaýshy tasityn taksi men avtobýstyń tizginin ustaǵan azamattardy tártipke salamyz dep, Úkimet Májiliske zań jobasyn usynǵan.
Bul zań jobasynyń maqsaty - jolaýshylardy avtomobilmen tasymaldaý salasyndaǵy memleket quzyretiniń bir bóligin ózin-ózi retteý uiymdaryna berý, "SRO" qurý.
"Buǵan sarapshylar áýel bastan qarsy boldy, Májiliste de talai túirep, synymyzdy dáiekpen aittyq. Biraq memlekettik organdar tasjoldaǵy qaýipsizdikti ózderi retke keltire almai otyryp, jaýapkershilikti jekemenshik uiymǵa ysyra salýǵa baǵyttalǵan baǵdarynan bas tartpai otyr", - dep synady depýtat.
Qandai másele kóterildi?
Depýtat máslelerdi jipke tizip aityp berdi:
- Zań jobasy ózin-ózi retteý uiymdaryna jolaýshylar tasymalyndaǵy tarifti belgileý, baǵany retteý quzyretterin bermek. Bul - qate. Qurylýy múmkin ózin-ózi retteý uiymdary azamattarymyzdy aiamaityny ekibastan belgili. Bul jerde tutas salany jekemenshik ujymdarǵa jyǵyp berý - monopoliiany qoldan jasaýǵa baǵyttalǵan qisynsyz áreket. Bizdiń Úkimet tyńnan túren salyp jatqan joq. Máselen taksi qyzmetin ózin-ózi retteý uiymyna bergenderdiń biri AQSh, Kaliforniia shtaty. Saldary aýyr, birinshiden, tutas salaǵa qojaiyn bolǵan qaýymdastyq ózine jaqyn taksi kompaniialaryn ǵana tirkep, qalǵandaryna jolaýshylar tasymaldaýǵa tyiym salǵan. Ekinshiden, jekeniń qolyna ótken saladaǵy qaýipsizdik talaptary jeńildetilgendikten, taksiler demalyssyz jumys istegen. Saldarynan taksilerge qatysty jol apattary 15 paiyzǵa kóbeigen. Bul - SRO-ny engizgenniń saldary.
- Jolaýshylardy avtomobilmen tasymaldaý salasyndaǵy qaýipsizdik máselelerin ózin-ózi retteý uiymyna berý - adamdardyń ómirine júrdim-bardym qaraýdyń naqty kórinisi. Aqshanyń artynan qýǵan jekemenshik uiymdar qaýipsizdikke qalai bolsa solai qaraityny aitpasa da túsinikti. Mysaly Braziliiada jolaýshy tasymaldaý ózin-ózi retteý uiymyna berilgen. Olar dereý avtobýstarǵa beriletin litsenziianyń talaptaryn jeńildetip tastaǵan. Saldarynan avtobýstarǵa qatysty jol apattarynyń sany 15 paiyzǵa kóbeigen, japa shekkender sanynda esep joq. Bizdiń elde de jol apattary jyl saiyn júzdegen adamnyń ómirin jalmaidy, bul problemany memlekettik organdar sheshe almai otyryp, aqyr aiaǵynda joldaǵy qaýipsizdikti ózin-ózi retteý uiymyna bere salý týraly sheshimderi aqyldy adamnyń áreketi emes.
- Úshinshi másele. Qazaqta "Sarań bai soiýǵa qozy tappai, jarlynyń jalǵyz toqtysyn suraidy" degen sóz bar. Jumyssyz júrgen jandar men ailyǵy shailyǵynan artylmaityn aǵaiyn taksi bolyp nápaqa taba bastaǵany sol edi, ýákiletti ministrlik bul salany "reformalaý kerek" degen bastamamen shyǵa keldi. Ministrliktiń oiynsha, endi ár taksist ózin-ózi retteý uiymyna múshe bolyp jarna tóleýi kerek eken. "Depýtattar bul normaǵa qarsy shyqqanda, jarnanany taksi qyzmetimen ainalysatyn mobildi qosymshalarǵa tirkelgen jeke kásipkerler tóleidi" dedi ministrlik. Biraq mindetti tólemderdiń engizilýi jolaýshy tasymaldaý qyzmetiniń qymbattaýyna ákeledi, japa shegetin qarapaiym halyq.
"Taksi jáne avtobýspen jolaýshy tasymaldaityn salaǵa ózin-ózi retteý uiymyn engizý, iaǵni SRO quryp azamattardy onyń qataryna kirýge mindetteý - tutas salanyń bir qolǵa ótýine, saldarynan monopoliianyń oryn alýyna aparar jol", - dep ashyndy ol.
Kólikten 5 minýttan artyq otaldyrýǵa qatysty...
Nartai Sársenǵaliev kólikti 5 minýttan artyq qyzdarǵandarǵa aiyppul salý týraly erejeni de synǵa aldy.
"Qazir qoǵamda qyzý talqylanyp jatqan, avtokólikti 5 minýttan artyq otaldyryp turýǵa bolmaidy degen aqylǵa tompaq talaptan attap kete almaimyn. Bul - 20 jyldan asa ýaqyt buryn Úkimet bekitken sheshim. Biraq bul qaýly qate ekenine bárimizdiń kózimiz jetip otyr, qoǵamda qatań synǵa aldy. Qaqaǵan qysta avtokóligin 5 minýttan artyq otaldyrǵan azamattardy qazir bireýler beinetaspaǵa túsirip, saldarynan quzyrly oryndar aiyppul salyp jatyr. Bul - aqylǵa syimaityn sheshim, sebebi saryshunaq aiazda kólikti qyzdarmasań temir tozady, kólik buzylady, ony jóndep shyǵynǵa batatyn baiaǵa buqara halyq. Bul týrasynda bir ǵana usynys bar, avtokólikti 5 minýttan artyq otaldyryp turýǵa tyiym salatyn ministrliktiń sheshimin dereý qaita qaraý kerek", - dedi ol.
Depýtat kólik otalyp turǵannan ekologiiaǵa ziian keledi deitinderge aldymen aýaǵa tonnalap ziian qaldyq tastaityn zaýyttar men aspannan qara qar jaýdyratyn mekelerdi tártipke salýdy usyndy.
