Bilim jáne ǵylym ministrligi Mektepke deiingi jáne orta bilim departamentiniń direktory Sholpan Qarynova oqýshylarǵa túsetin júktemeniń qalai jeńildetiletinin aityp berdi, - dep habarlaidy "Ult aqparat" Tengrinews.kz agenttigine silteme jasap.
"BǴM buiryǵy boiynsha, búgin oqýshylardyń úi tapsyrmasy 150 minýttan aspaityn boldy. Sonymen qatar, demalys kúnderi men mereke kúnderine kórkem mátinder men ǵylymi jobalardy oryndaýdan ózge úi tapsyrmasy berilmeidi", - dedi departament basshysy úkimet úiindegi baspasóz máslihatynda.
Aita keteiik, Bilim jáne ǵylym ministrliginiń "Úi tapsyrmalaryn retteý týraly" zańy 2017 jyly qabyldanǵan bolatyn.
"Qazirgi tańda úi tapsyrmalarynyń úshten bir bóligi qysqarǵan. Qujat is júzinde, biylǵy oqý jylynyń 1 qyrkúieginen bul jumys normativ deńgeide. Bul máseleler pedagogikalyq ortada qyzý talqylanyp jatyr, aqparat qala jáne aýdandardyń bilim basqarmalaryna taratyldy. Bul zań laiyqty deńgeide jumys isteýi kerek. Qazir oqýshylarǵa jalpylai júktemeni jeńildetýge tyrysyp jatyrmyz. Sanitarlyq talaptarǵa 5 jumys kúnine syiatyndai normalar engizildi", - deidi Qarynova.
Eske salaiyq, Nursultan Nazarbaev Qazaqstan halqyna joldaýynda oqýshylardan júktemeni alyp tastaýdy tapsyrǵan bolatyn.
"TMD elderi arasynda oqýshylarǵa salynatyn júkteme bizde eń joǵarǵy jáne EYDU elderindegiden úshten bir ese artyq ekenin eskere otyryp, olardy azaitý kerek", - degen edi ol.
