Sybailas jemqorlyqqa qarsy qyzmet burynǵy bilim jáne ǵylym vitse-ministri Elmira Sýhanberdievanyń №3 mektebiniń direktory Elena Sheverniaevamen zańsyz kásipkerlik shemasyn jariialady, dep habarlaidy QazAqparat.
Agenttiktiń asa mańyzdy isteri boiynsha tergeýshisi Rinat Aimuqanovtyń aitýynsha, Nur-Sultan qalasynyń №3 gimnaziiasynda uzaq ýaqyttan beri jeke mektep jumys istep kelgen.
«Bul mektep is júzinde E. Sheverniaevaǵa tiesili bolǵan. Isti kedergisiz júrgizý úshin E. Sheverniaeva óziniń qurbysy vitse-ministr Sýhanberdievamen birlesip jumys istegen. Olar ózderiniń qyzmettik ókilettigin paidalanyp, mektepke «qamqorlyq» jasap kelgen. 2016 jyly bilim basqarmasy óz oqýshylaryna oryn jetpei jatqan memlekettik mektepte jeke mekteptiń jumys istep turǵanyn synǵa alyp, direktor E. Sheverniaevaǵa shara qoldanýdy tapsyrǵan. Direktor qurbysy E. Sýhanberdievaǵa júginip, bilim basqarmasyna yqpalyn tigizgen», - dedi Rinat Aimuqanov elordada agenttik pen qalalyq bilim basqarmasynyń birlesken jinalysynda.
Sybailas jemqorlyqqa qarsy qyzmettiń tekserýi barysynda synyp jetpegen oqýshylardyń jertólede oqyǵany anyqtalǵan.
«Sanitarlyq-epidemiialyq baqylaý men órt qaýipsizdigi qyzmeti mektepten birqatar zańbuzýshylyqtar tapty. Anyqtalǵandai, gimnaziianyń 48 oqý kabineti jeke mektepke jalǵa berilgen, 10 kabinet pen taǵy bes kabinet biriktirilgen. Bul jalpy synyptar sanynyń 20% quraidy. Bul mektepte oqýshylardyń kóptigi buryn da baiqalǵan. Al E. Sheverniaeva memlekettik organdarǵa mekteptiń óz synyptaryn jalǵa bere alatyny týraly derek ótkizgen. Memlekettik mektep oqýshylary kabinet jetispeýshiliginen jertólede, bala toly synypta oqýǵa májbúr bolǵan. Atap aitqanda, «alǵashqy áskeri daiyndyq» pen «tehnologiia» sabaqtaryna uldar men qyzdar jertólede bir synypta oqyǵan», - dedi R. Aimuqanov.
Odan bólek, tergeýshiniń aitýynsha, 3 jylda mekteptiń bos oryn joq degen jeleýmen balalardy qabyldamaý faktileri bolǵan.
Nur-Sultan qalalyq bilim basqarmasynyń basshysy mindetin atqarýshy Gúljan Aitjanova №3 mekteptiń qazirgi jaǵdaiy týraly suhbat berdi.
«Qazir bári ózgerdi, jeke mektep ujymy ǵimarattan shyǵaryldy. Onymen kelisimsharty bitken balalar memlekettik mektepke aýysty. Qazirgi ýaqytta mektep direktory mindetin Qarlyǵash Qalimjanqyzy ýaqytsha atqarady», - dedi G. Aitjanova.
