Oqýshylar shkafy Bilim jáne ǵylym ministrliginiń biýdjetimen sheshilse, bir-aq kúnde sheshetin edik. Mundai pikirdi búin Úkimet otyrysynan keiin vedomstvo basshysy Ashat Aimaǵambetov bildirdi, dep habarlaidy "Ult aqparat".
«Eger barlyǵy da buiryqtar men basqa da normativtik-quqyqtyq aktiler arqyly júzege asyrylatyn bolsa, onda árine jaǵdai múldem basqasha bolar edi. Esterińizde bolsa, osydan eki jyl buryn jergilikti atqarýshy organdarǵa aýylǵa arnalǵan sýburqaqqa, oqýshylardyń oqýlyqtaryn, aýystyryp kietin aiaq kiimin, basqa da zattaryn qaldyryp keletin shkaftarǵa aqsha qarastyrýdy ótingen edik. Qazirgi ýaqytta bul protsess aitarlyqtai qarqyndy júrgizilip jatyr. Degenmen, bul problema 100 paiyz sheshildi dep aita almaimyz», - dedi ministr.
Onyń atap ótýinshe, ministrlik jergilikti atqarýshy organdardan kelesi jylǵy biýdjette oqýshylarǵa arnalǵan shkaftar ornatýǵa qosymsha aqsha qarastyrýdy ótinip otyr.
«Shyndyǵynda da bul óte mańyzdy másele. Jalpy, shkaf máselesin bir ministrliktiń biýdjetimen sheshýge bolatyn bolsa, árine ony biz bir kúnniń ishinde sheshetin edik. Bul keshendi másele», - dedi Ashat Aimaǵambetov.
