Tanymal akter Ramazan Amantai osy kúnge deiin tapqan tabysyn durys jumsai almai, áli baspanaly bolmaǵanyn aitty. Óner iesi qarjyǵa qatysty qatelikterin eske alyp, kózine jas alǵanyn da jasyrmady, dep habarlaidy ult.kz.
Ramazan Amantai bul týraly jýrnalist Ainur Asanberdiniń "Áńgime bar" podkasyna bergen suhbatynda aitty. Onyń sózinshe, osy ýaqytqa deiin tapqan aqshasyna birneshe baspana satyp alýǵa múmkindik bolǵan. Alaida ol qarajatyn jinaýdyń ornyna ońdy-soldy jumsaǵan.
"Jiyrma úi alatyndai aqsham bolǵan shyǵar osy kúnge deiin. Biraq aqylym bolmapty. Áielim aitpaidy emes, aitady. Men boi bermeimin. Aqshany áielim jinaityn shyǵar dep oilaityn shyǵar, biraq aqsha ózimde bolady. Eshqandai jaǵdaida oǵan bermeimin. Ózimde ǵana bolady. Men dalaǵa shashamyn. Kóp aqymaqtyǵyma kýá baýyrlarym bar. Sonyń barlyǵyn esime túsirip, jylap jiberdim", – dedi akter.
Suhbat barysynda óner iesi jubaiymen aradaǵy qarym-qatynasyna da toqtaldy. Ol bir kontsertte áieliniń kózinshe burynǵy mahabbattaryn eske alyp, ánderiniń kimderge arnalǵanyn kópshilikke aityp bergenin jetkizdi.
Akter keiin bul áreketiniń jaryna aýyr tigenin túsingen.
"Ol keshte men burynǵy mahabbattarym týraly aityp turmyn ǵoi, túrime qaramai. Ánderimniń tarihyn aityp turmyn. Birinshi júrgen qyz, ekinshi júrgen qyz dep. Sońynda osy áńgimeni tyńdap otyrǵan áielime ońai emes. Biraq myń jylda bir týatyn aqyndardyń áieli de myń jylda bir týady. Sol úshin anaý-mynaý adam óner adamyna jar bolmaidy. Sol úshin de raqmet dep keshirim suradym", – dedi ol.
Osy oqiǵadan keiin Ramazan Amantai jubaiyna degen sezimin án arqyly jetkizgen. Óner iesi Qazybek Quraiysh oryndaityn "Súiemin" ánin jaryna arnap jazǵanyn aitty.
"Qazybek aǵamyz aityp júrgen "Sheksizdikten sezimge toly ishim" degen ándi betine qarap otyryp jazǵan edim. Sońynda ekeýmiz jylap qaldyq", – dep eske aldy akter.
Osylaisha, Ramazan Amantai suhbatynda ótken ómirindegi qarjylyq qatelikterin ǵana emes, óner jolynda janynan tabylǵan jubaiynyń tózimi men qoldaýyn da erekshe baǵalaitynyn jetkizdi.
Ramazan Amantai kim?
Ramazan Bolatuly Amantai – qazaqstandyq akter, aqyn, án avtory ári kinoprodiýser. Ol 1998 jyly 28 jeltoqsanda Almaty oblysynyń Talǵar qalasynda dúniege kelgen. Ákesi Bolat – ekonomist, al anasy Roza Esbosynova – Qurmanǵazy atyndaǵy Qazaq ulttyq konservatoriiasyn bitirgen kúishi. Ramazan bala kezinen dombyra tartyp, Qytai, AQSh, Ispaniia, Italiia, Frantsiia jáne Germaniia elderinde óner kórsetken. Ol "Kókil" mektebinde bilim alyp, keiin ál-Farabi atyndaǵy Qazaq ulttyq ýniversitetinde oqyǵan.
Óner jolyn erte bastaǵan akter "Ainalaiyn" telehikaiasynda Arman esimdi keiipkerdi somdaǵan.
Kópshilikke "Qazaqsha biznes" filmindegi Erkósh róli arqyly keńinen tanyldy.
Sondai-aq 2024 jyly jaryq kórgen "Zamanback" filminde basty keiipker Azattyń rólin somdady. 2026 jylǵy 22 qazanda kinoteatrlarǵa jol tartqan "Zamanback 2" filminde de osy keiipkerdiń beinesin alyp shyqty. Atalǵan týyndyda Azat ótken shaqqa oralyp, ákesiniń jastyq shaǵymen tanysady.
Akterlik ónermen qatar án jazýmen ainalysatyn Ramazan Amantai 2023 jylǵy suhbatynda 400-den astam án jazǵanyn aitqan. Onyń qalamynan "Aiagóz, qaida barasyń?", "Problema joq", "Tátti mahabbatym" sekildi ánderdiń mátini týǵan.
