Tanymal ánshi ári aktrisa Aqbota-Nur Seitmaǵambet 30 jasqa tolǵan týǵan kúnin Maldiv araldarynda atap ótti. Óner iesi jańa jasqa qadam basqan sáttegi sezimi men aldaǵy ómirden ne kútetinin aityp, oqyrmandarymen syr bólisti, dep habarlaidy ult.kz.
Aqbota-Nur Instagram paraqshasynda muhit jaǵasynda aq kóilek kiip túsken beinejazbasyn jariialady. Ol otyz jasty jastyq jiger men ómirden jinaǵan tájiribe toǵysatyn erekshe kezeńge teńegen.
"Jastyqtyń ekpinine júrektiń danalyǵy qosylatyn shaq", – dep jazdy aktrisa.
Óner iesi jiyrma jasynda talai armannyń jeteginde júrip, ómirden kóp nárse kútkenin eske aldy. Keide qýanyp, keide kóńili túsip, ýaqyt óte kele ózin jaqsyraq tani bastaǵanyn jetkizdi.
"Bir esiktiń ashylǵanyna qýandym, bir esiktiń jabylǵanyna muńaidym. Keide ózimmen ońasha qalǵanda ǵana túsinetin sezimderim boldy. Keibir jaýaptardy ýaqyttan izdedim, al keibirin óz júregimniń únin tyńdai bilgenimde ǵana taptym!", – dedi ol.
"Óz bolmysyma adal bolǵym keledi"
Aqbota-Nur endigi ómirinde asyǵystyqqa salynbai, ár sáttiń qadirin bilgisi keletinin aitty. Ol ózgelerdiń kóńilinen shyǵýdan góri óz júreginiń qalaýyn tyńdaýdy mańyzdy sanaitynyn jetkizdi.
"Endi asyqpai ómir súrgim keledi. Ádemi kórinýdi ǵana emes, ádemi sezinýdi. Bárine unaýdy emes, óz bolmysyma adaldyqty, kópke tanylýdy ǵana emes, bir adamnyń júregine shyn jylý syilai alýdy. Armandaryma jetýdi ǵana emes, sol jolda ózimdi joǵaltpaýdy", – dep jazdy ánshi.
Onyń pikirinshe, áieldiń sulýlyǵy jasyna emes, jan dúniesine, náziktigi men parasatyna bailanysty. Sondyqtan ol aldaǵy ýaqytta da óz bolmysyn joǵaltpai, ómirdiń ár kezeńinen jaqsylyq kórgisi keletinin bildirdi.
Ánshi týǵan kúninde eń aldymen balalarynyń amandyǵyn tilep, uly men qyzynyń qyzyǵyn kórýdi armandaitynyn aitty.
"Alla maǵan uzaq ári maǵynaly ǵumyr bersin! Altyn asyqtai ulym men gúl etip syilaǵan qyzymnyń bar baqytyn kórýdi jazsyn!" – dep jazdy Aqbota-Nur.
Óner iesiniń mereitoilyq jazbasy jeli qoldanýshylarynyń nazaryn aýdardy. Oqyrmandary ony týǵan kúnimen quttyqtap, jyly tilekterin jaýdyrdy. Kópshilik aktrisanyń sulýlyǵyna súisinip, jańa jasy qýanysh pen jaqsylyqqa toly bolýyn tiledi.
Aqbota-Nur kim?
Aqbota-Nur Seitmaǵambet – qazaqstandyq ánshi, aktrisa jáne telejúrgizýshi. Ol 1996 jyly 22 qazanda Túrkistan oblysynyń Kentaý qalasynda dúniege kelgen. Ónerge bala kezinen jaqyn bolyp, Súgir Báiterekov atyndaǵy mýzykalyq mektepte jeti jyl skripka úirengen. Keiin mýzykalyq bilimin jalǵastyryp, ánshilik ónerge den qoiǵan. 2012 jyly týǵan qalasynda ótken sulýlyq baiqaýynda "Kentaý arýy" atanǵan. 2015 jyly Baian Maqsatqyzy jetekshilik etken "KeshYOU" tobyna qabyldanyp, kópshilikke tanyla bastady. Sol jyly top quramynda Úndistannyń Goa óńirine baryp, alǵashqy sheteldik beinebaianynyń túsirilimine qatysqan
2016 jyly rejisser Asqar Uzabaevtyń "Glamýr dlia dýr" filmi arqyly kino salasyna qadam basty. Keiin "Taqiiasyz perishte", "Qalai da toi jasaý", "Mystan" jáne "Órmek" sekildi týyndylarǵa tústi.
Sondai-aq 2023 jylǵy "Maǵan nazar aýdar" jáne 2024 jylǵy "Chas pik" filmderindegi rólderimen tanyldy
Aqbota-Nur akter Dáýren Aidarqulovpen "Glamýr dlia dýr" filminiń túsiriliminde tanysqan. Ekeýiniń Ibrahim esimdi uly men Aisha esimdi qyzy bar. Ónerli jup 2020 jyly eki jaqqa ketkenimen, balalary úshin jaqsy qarym-qatynasty saqtap qalǵandaryn aitqan. Aqbota-Nur burynǵy ata-enesiniń bala tárbiesinde ózine qoldaý kórsetetinin de jasyrmaǵan. 2026 jylǵy 22 qazanda ánshi 30 jasqa tolyp, mereitoiyn Maldiv araldarynda atap ótti.
