وقۋشىلار شكافى بٸلٸم جەنە عىلىم مينيسترلٸگٸنٸڭ بيۋدجەتٸمەن شەشٸلسە, بٸر-اق كٷندە شەشەتٸن ەدٸك. مۇنداي پٸكٸردٸ بٷٸن ٷكٸمەت وتىرىسىنان كەيٸن ۆەدومستۆو باسشىسى اسحات ايماعامبەتوۆ بٸلدٸردٸ, دەپ حابارلايدى "ۇلت اقپارات".
«ەگەر بارلىعى دا بۇيرىقتار مەن باسقا دا نورماتيۆتٸك-قۇقىقتىق اكتٸلەر ارقىلى جٷزەگە اسىرىلاتىن بولسا, وندا ەرينە جاعداي مٷلدەم باسقاشا بولار ەدٸ. ەستەرٸڭٸزدە بولسا, وسىدان ەكٸ جىل بۇرىن جەرگٸلٸكتٸ اتقارۋشى ورگاندارعا اۋىلعا ارنالعان سۋبۇرقاققا, وقۋشىلاردىڭ وقۋلىقتارىن, اۋىستىرىپ كيەتٸن اياق كيٸمٸن, باسقا دا زاتتارىن قالدىرىپ كەلەتٸن شكافتارعا اقشا قاراستىرۋدى ٶتٸنگەن ەدٸك. قازٸرگٸ ۋاقىتتا بۇل پروتسەسس ايتارلىقتاي قارقىندى جٷرگٸزٸلٸپ جاتىر. دەگەنمەن, بۇل پروبلەما 100 پايىز شەشٸلدٸ دەپ ايتا المايمىز», - دەدٸ مينيستر.
ونىڭ اتاپ ٶتۋٸنشە, مينيسترلٸك جەرگٸلٸكتٸ اتقارۋشى ورگانداردان كەلەسٸ جىلعى بيۋدجەتتە وقۋشىلارعا ارنالعان شكافتار ورناتۋعا قوسىمشا اقشا قاراستىرۋدى ٶتٸنٸپ وتىر.
«شىندىعىندا دا بۇل ٶتە ماڭىزدى مەسەلە. جالپى, شكاف مەسەلەسٸن بٸر مينيسترلٸكتٸڭ بيۋدجەتٸمەن شەشۋگە بولاتىن بولسا, ەرينە ونى بٸز بٸر كٷننٸڭ ٸشٸندە شەشەتٸن ەدٸك. بۇل كەشەندٸ مەسەلە», - دەدٸ اسحات ايماعامبەتوۆ.
