Qazir tańda oqýshylar sómkesiniń salmaǵyn jeńildetý úshin mektepterde arnaiy pilottyq joba daiyndaý qolǵa alynǵan. Bul týraly OKQ-de ótken brifingte QR DSM Qoǵamdyq densaýlyq saqtaý komitetiniń tóraǵasy Jandarbek Bekshin aitty, dep habarlaidy Baq.kz tilshisi.
Onyń aitýynsha, májilis depýtattarynyń bastamasymen bilim ordalarynda oqýshylardyń kerek-jaraǵyn saqtaityn shkaftar ornatý máselesi qaralyp jatyr.
«Byltyr májilisi depýtaty Ersultan Bekturǵanovtyń usynysy negizinde atalǵan máselege bailanysty jumys toby quryldy. Sebebi, balalar sómkesiniń salmaǵy aýyrlai túsýi saldarynan skolioz, osteohondroz syndy aýrýlar shyǵýy múmkin. Sondyqtan atalǵan aýrýlardyń aldyn alý úshin mektepterde oqýshylardyń kerek-jaraǵyn saqtaityn shkaf ornatý usynysy engizildi. Bul joba pilottyq negizde ótken jyldyń ekinshi jartyjyldyǵynda júzege asyryla bastady», - dedi elimizdiń bas sanitar dárigeri.
Osy oraida Jandarbek Bekshin atalǵan máseleni birden sheshý múmkin emestigin aitty.
«Bul máseleni jarty jyldyń ishinde sheshý múmkin emes, sondyqtan josparly túrde synyptarda osyndai shkaftar qoiylyp jatyr. Sol shkaftarǵa oqýshylar aýyr oqýlyqtardy, aiaq-qiimderdi qaldyra alady. Bul balalar sómkesiniń salmaǵyn jeńildetýge múmkindik beredi», - dedi ol.
Alaida elimizdiń bas sanitar dárigeri bul shkaftardyń qansha mektepte qoiylǵanyn aita alǵan joq.
«Naqty neshe mektepke qoiylǵanyn aita almaimyn, sebebi tamyz aiynda biz mektepterdi tekserip shyǵamyz. Sonda qansha mektepte qansha (shkaf - avtor) qoiylǵany anyqtalady», - dedi elimizdiń bas sanitar dárigeri.
