QR Aqparat jáne damý ministrliginiń qoldaýymen Qazaq radiosynyń 100 jyldyǵyna orai «Altyn qor. Amanat» aýdiojinaǵy jaryqqa shyqty, dep habarlaidy "Ult aqparat".
«Amanat» aýdiojinaǵyna «Altyn qordaǵy» qundy habarlar men qazaq án-kúi óneriniń injý-marjany engizilgen. Jinaqqa 1954 jyldan bergi saqtalǵan túpnusqa aýdiolar engizildi. «Qazaqstan» teleradiokorporatsiiasynyń «Altyn qorynda» 1940 jyldarynan beri saqtalǵan 110 myńnan asa tarihi-jádigerlik beine jáne aýdiotaspa saqtalǵan. Taspalardyń jalpy uzaqtyǵy 42 myń saǵatty quraidy.
Aýdiojinaq «Dáýir úni», «Atadan qalǵan asyl sóz», «Batyrlar jyry», «Án óneri», «Kúi», «Salt-dástúr» jáne «Ertegi» dep atalatyn 7 bólimnen turady.
«Dáýir úni» bóliminde M.Erjanov, M.Áýezov, S.Muqanov, I.Esenberlin, A.Súleimenov, B.Soqpaqbaev, Ǵ.Músirepov, M.Álimbaev syndy 100 ult qairatkeriniń ár jyldary jazylyp daýystary túpnusqada berildi.
«Atadan qalǵan asyl sóz» bóliminde 1948 jyldan bastap folklorǵa qatysty Qazaqstan tóńireginde júrgizilgen túrli ekspeditsiialardaǵy kónekóz qariialardyń sheshendik óner jaiyndaǵy suhbattary qamtylǵan. Suhbattardyń uzaqtyǵy 35 saǵatty quraidy.
«Batyrlar jyry» bóliminde 50 biregei nusqasy jazylǵan.
«Án óneri» taraýynda Q.Baijanov, K.Ázirbaev, Q.Babaqov, Á.Qashaýbaev, J.Elebekov, J.Kármenov, J.Omarova, Ǵ.Qurmanǵaliev, M.Eshekeev, S.Ábeýov siiaqty qazaq án óneri maitalmandarynyń daýysy saqtalǵan aýdiorolikterdi tyńdaýǵa bolady.
Qazaq radiosynyń «Altyn qorynda» elimizdiń birtýar tulǵalarynyń syr-suhbatymen qatar, 1948 jyldan bergi jinaqtalǵan qazaq kúiiniń mol qory saqtalǵan. D.Nurpeiisova, L.Muhitov, Q.Jantileýov, N.Tilendiev, Sh.Ábiltaevtyń oryndaýyndaǵy 100 kúi aýdiojinaqtyń «Kúi» dep atalatyn taraýyna jinaqtalǵan. «Syńsý», Besik jyry, «Jar-jar», «Betashar», «Jarapazan», Joqtaý» syndy turmystyq-ǵuryptyq ánderi «Salt-dástúr» bóliminde qamtyldy.
Qazaq radiosynda 1959 jyldan bastap «Ertegi» aidarymen 350 habar daiyndalǵan. Habarlar «Erden atanyń ertegileri», «Zámzágúl ájeniń ertegileri», «Aidos atanyń ertegileri» jáne «Saýyq ájeniń ertegileri» degen ataýmen jańartylyp, jinaqqa ár jyldary jazylǵan 100 ertegi nusqasy engizildi.
Aýdiojinaqtyń basty ereksheligi - usynylǵan týyndylar arnaiy flesh-kardqa jazylǵan: ár bólimniń sońyndaǵy QR-kod arqyly radio saitynan jáne Korporatsiianyń altynqor.com portalynan jinaqtyń elektrondy nusqasyn tyńdaýǵa bolady.
Atalǵan biregei material mektep oqýshylary men stýdentterge qoljetimdi bolýy úshin oblys ortalyqtary men elimizdiń joǵary oqý oryndaryndaǵy kitaphanalarǵa jetkiziledi dep josparlanýda. Bul Táýelsiz Qazaqstannyń ósip kele jatqan jas býynyna mádeni muralardy nasihattaýǵa da úles qosady.
