Foto: "Almatykitap" baspasy
Qazaqstanda oqýlyqtarǵa qatysty máseleler qoǵamda jii pikirtalas týdyrady. Oqýlyqtardyń mazmunyna qatysty shaǵymdardan bólek, jýyrda májilis depýtaty Dáýlet Muqaev olardyń ártúrli kólemde shyǵatynyn aityp synady. Onyń aitýynsha, osynyń saldarynan otbasy jyl saiyn ártúrli muqabalar satyp alýǵa májbúr. Oqý materialdarynyń qurylymy jáne mektep oqýlyqtary tóńiregindegi ózekti máseleler «Almatykitap» baspasy uiymdastyrǵan dóńgelek ústelde talqylandy.
Baspagerlerdiń ózi synnan qatty sharshaǵanyn aitady. Keibir syn oryndy bolsa, keibiri tipti orynsyz deidi olar. Óitkeni kitap shyǵarý birneshe kezeńnen ótetin kúrdeli protsess. Baspa prezidenti Gaýhar Saimasaeva oqýlyq oqýshynyń qolyna jetkenge deiin birneshe mamannyń saraptamasynan ótetinin eskertti.
Foto: "Almatykitap" baspasy. Gaýhar Saimasaeva
«Bizde ministrlik janynda Respýblikalyq ǵylymi-praktikalyq bilim mazmunyn saraptaý ortalyǵy bar. Bul ortalyq oqýlyqtar men oqý baǵdarlamalarynyń saraptamasyn júrgizedi, olardy Altynsarin atyndaǵy Ulttyq bilim akademiiasy ǵalymdary ázirleidi. Bizge oqýlyqtardy daiyndaý úshin belgili bir ýaqyt beriledi, keide, ókinishke orai, bul ýaqyt óte az bolyp jatady. Ujymmen jumys istep, ishki saraptamadan ótkizgen soń, oqýlyqtardy tájiribeli muǵalimderge usynamyz jáne olardyń pikirlerin eskeremiz. Sodan keiin oqýlyqtardy «Bilim mazmunyn saraptaý ortalyǵyna» saraptamaǵa jiberemiz. Qyryq kúnnen keiin olardan eskertýler men usynystar alamyz, onda da sarapshylardyń úlken toby jumys isteidi. Keiin bizge bir ai ýaqyt beriledi jáne eger oqýlyq qaita basyp shyǵarylsa, ony ekinshi saraptamaǵa usynamyz. Eger oqýlyq jańa bolsa, ol aprobatsiiadan ótedi. El boiynsha arnaiy tańdalǵan mektepterde eki ai ishinde oqýlyqty muǵalimder men ata-analar qaraidy.
Biz ekinshi saraptamanyń nátijelerin jáne aprobatsiia nátijelerin alamyz, nátijesinde eki kezeńdik saraptamadan ótedi. Úshinshi kezeńge kóshemiz – bul kezeńde úlken respýblikalyq komissiia jumys isteidi. Komissiia quramynda kóptegen adamdar bar: tájiribeli muǵalimder, olardy arnaiy Astanaǵa shaqyrady. Eki apta boiy olar barlyq oqýlyqtardy qaraidy jáne eger biz respýblikalyq komissiiadan ótsek, «Bilim mazmunyn saraptaý ortalyǵy» Oqý-aǵartý ministrligine saraptamadan ótken oqýlyqtar tizimin usynady. Osylaisha, biz belgili bir tizimge kiremiz. Iaǵni, memlekettik saraptamanyń úsh kezeńi bar. Al baspada korrektýra, redaktýra, ádistemeshilerdiń jumysy jáne baspanyń óz saraptamasy bar. Oqýlyq tórt túrli saraptamadan ótedi», - deidi Gaýhar Saimasaeva.
Foto: "Almatykitap" baspasy. Asima Rysqulbekova
Baspanyń vitse-prezidenti Asima Rysqulbekova Qazaqstanda Oqýlyqtaný ǵylymy jas ǵylym ekenin eskertti. Tek 2015 jyldan bastap qana ǵalymdar tól oqýlyqtarymyzdy jazýǵa kóshken, al buǵan deiin oqýshylar aýdarma oqýlyqtardy oqyp kelgen.
«2015-2016 jyldardan bastap biz alǵash jańa bilim berý mazmunyna kóshtik. Oǵan deiin bizdiń tól oqýlyqtarymyz, tól avtorlarymyz bolǵan joq. Negizinen biz aýdarma oqýlyqtardy oqydyq. Avtorlar mektebi endi ǵana qalyptasyp kele jatyr. Bizdiń avtorlarymyz osy oqýlyqtaný ǵylymynyń qyr-syryn endi meńgerip jatyr», - deidi ol.
Alaida qoǵam tarapynan qatty-qatty aitylatyn syn-eskertpeler kóptegen avtordy oqýlyq jazý raiynan qaitaryp tastaityn kórinedi.
«Avtorlyq mektep endi ǵana qalyptasyp kele jatyr. Myqty avtorlardy endi daiyndap jatyrmyz. Qoǵam tarapynan janashyrlyqpen kemshilikterin aitsa, biz ony qýana qabyldar edik. Qatty syn-eskertpeler bolashaqta bizdiń myqty ǵalymdarymyzdyń, myqty pedagogtarymyzdyń jaqsy oqýlyq jazýdan bas tartýyna ákelýi múmin. Bolashaqta myqty oqýlyq jazatyn avtorlardy tappai qalýymyz múmkin», - dep alańdaidy Asima Rysqulbekova.
Foto: "Almatykitap" baspasy
Al oqýlyqtar pishininiń ártúrliligine keler bolsaq, baspa prezidentiniń aitýynsha, qazir 1-2, 4-synyp oqýlyqtarynyń bári bir formatta shyǵarylady, tek 3-synyp oqýlyqtary ǵana jańalaýdy talap etedi.
«Kóp muǵalim oqýlyqtar partaǵa syimaidy, balalarǵa yńǵaisyz dedi. Sodan keiin ministrlik arnaiy sheshim qabyldap, bári birdei formatpen shyǵarylatyn boldy. Qazir mektepterde 1-2, 4-synyp oqýlyqtary tolyǵymen aýystyryldy. 3-synypta áli burynǵy oqýlyqtar qoldanysta bar, sebebi oǵan áli jańa baǵdarlama kelgen joq, sony kútýdemiz. Jańa baǵdarlama kelse, osyndai standartty formatpen shyǵaramyz», - dedi baspa prezidenti.
Foto: "Almatykitap" baspasy. Olga Dzerjinskaia
Tól oqýlyqtar burynǵy Keńes Odaǵynyń oqýlyqtarynan áldeqaida kúrdeli degen syn-eskertpelerge metodist Olga Dzerjinskaia jaýap berdi.
«Biz buryn 1+1 qalai oqysaq, qazir de solai oqytyp jatyrmyz. Kóbeitý kestesin qai kezde oqysaq, júieli túrde qazir de solai oqytamyz. Ata-analar kóbeitý kestesi júiesiz beriledi deidi, múldem olai emes. Buryn biz muny joǵary synyptarda oqydyq deidi. Men 1989 jyly shyqqan kitapty alyp keldim. Bizdiń oqýlyqtarda material qalai berilse, sol tártippen buryn da berilgen. Túk te ózgergen joq. Jaqynda bir oqýlyqqa qatysty eskertý boldy, teńdeýdi biz orta synyptarda sheshtik deidi. Teńdeýdi árqashan bastaýysh synypta oqyǵanbyz. Qazir bastaýysh synypqa tek kóp sanǵa kóbeitý ǵana qosyldy», - dep túsindirdi ol.
Degenmen, baspagerler janashyrlyq tanytyp, syn-eskertpesin joldap otyratyn barshaǵa alǵysyn bildiredi. Baspa tarapynan zamanaýi oqýlyqqa qoiylatyn talaptardy zerdelep, eń myqty tustaryn oqýlyqtarǵa engizip jatqandaryn aitty. Osy oraida 1-11 synyp oqýshylaryna arnalǵan Topiq.kz elektrondyq oqýlyqtar platformasyn jasap shyǵarǵan. Barlyq oqýlyqtar QR BjǴM barlyq talaptaryna sáikes keledi. Tsifrlyq oqýlyq – baspa oqýlyqtyń pdf nusqasy emes, interaktivti tapsyrmalary bar mýltimediialyq oqý quraly. Elektrondyq oqýlyqtar kóptegen aýdio, beine materialdardan turady. Bul taqyrypty tereńirek túsinýge, ózin tekserýge arnalǵan tapsyrmalardy oryndaý men oqý materialyn tabysty meńgerýge baǵyttalǵan.
Foto: "Almatykitap" baspasy
Daiyndaǵan: Anara Baýyrjanqyzy
