QR májilisiniń depýtaty Omarhan Óksikbaev úkimetke nysandardy jekeshelendirýge týyndap otyrǵan birqatar máselege tereńirek úńilýge keńes berdi, dep habarlaidy Sputnik Qazaqstan tilshisi.
Halyq qalaýlysy búginde ózin-ózi aqtap, memleketke paida keltirip otyrǵan tiimdi mekemeler nege jekeshelendirýge shyǵarylǵanyn túsinbeitinin aitty.
"Búgin biz bárin jekeshelendiremiz dep jatyrmyz. Jalpy jekeshelendirý naryqtyq ekonomikada kerek shyǵar, biraq qai mal iesi sútti mol berip otyrǵan siyryn satady? Qarap otyrsaq, satylýǵa berilip otyrǵan nysandardyń kóbisi – búgingi tańda ózin-ózi aqtap otyrǵan, rentabeldigi óte joǵary, memleketke tiimdi, júieli basqarýdaǵy mekemeler. Sonda olardy ne úshin, kim úshin, nege satamyz? Bul suraqty halyq ta qoiady, men de qoiamyn… Jańa áriptesterim aityp ketti, kezinde biz áleýmettik mekemelerdi, balabaqshalardyń bárin satqyzdyq. Munyń bári halyqaralyq institýttardyń usynysymen satyldy. Aýyl sharýashylyq nysandaryn túgeldei sattyq. Aqyr aiaǵynda jekege ketkenderdiń basyn qosa almai otyrmyz qaitadan",- dedi Óksikbaev májilistegi úkimet saǵatynda.
Depýtat ótkenge taldaý jasap, qatelikti qaitalamaýdyń jolyn qarastyrý kerektigin atap ótti.
"Búgin, sizder bar dúnieni satyp, endi taǵy da tiimdi jolyn izdeiik dep jatyrmyz deisizder. Qaýly shyqty, nysandardyń barlyǵyn jariia ettińizder. Qanshama resýrs ketti, saraptama jasaldy, nysandar baǵalandy. Endi "Eir Astanany" qaitadan qaraiyq deidi. Jańaǵy "Turǵyn úi qurylys jinaq bankin" taǵy da qarap kóremiz dep aityp jatyrsyzdar. Bul ne degen mazaq sonda? Nege biz qaitadan oralýymyz kerek. Sender sonyń bárin qaýlyǵa kiretin kezde zerdelep, saraptaǵan joqsyńdar ma? Kim saraptady, kim usynys berdi? Onda sony shyǵaryńyzdar, sol jaýap bersin búgin. Al endi qazir sizder keri oralatyn bolsańyzdar, onda mynaý tizimniń bárin qaitadan qaraý kerek", — dep ashýlandy depýtat.
Óksikbaev osy oraida senimgerlik basqarýǵa berilgeli jatqan "Saryaǵash" shipajaiynyń taǵdyryna alańdady.
"Keshe ǵana maǵan hat keldi. Ózin-ózi aqtap otyrǵan, áleýmettik "Saryaǵash" shipajaiy senimgerlik basqarýǵa on jylǵa berilgeli jatyr eken. Bul Qazaqstandaǵy eń arzan joldama beretin, halyqqa qoljetimdi, emdeletin shipajai. Ózin-ózi aqtap otyr, biýdjetten aqsha surap otyrǵan joq. Endi kelip, biz on jylǵa senimgerlik basqarýǵa bermekpiz. Sol kezde ne qalady? Bizdiń utarymyz ne? Munyń barlyǵy úkimettiń jekeshelendirý máselesine qaita oralýyn talap etedi. Qaitadan qarańyzdar, saraptańyzdar, bul másele tereńdikti, jaýapkershilikti talap etedi", — dedi halyq qalaýlysy.
Óksikbaev ulttyq ekonomika ministrinen kvazisektordaǵy nysandardyń balansynda qalǵan aqshanyń qaida jumsalatynyn surady.
"Kvazimemlekettik sektorda qanshama nysan satyldy, sonyń júz milliardqa jýyǵy tolyqtai ózderiniń balansynda qaldy. Al olar keshe ǵana biýdjettiń aqshasymen qalyptasqan kvazisektor. Biz onsyz da olarǵa búkil dividentti qaldyryp otyrmyz. Timýr Muratuly (ulttyq ekonomika ministri – (red.eskert.), siz ekonomistsiz ǵoi, sol aqsha qandai baǵytqa ketedi erteń? Kvazisektor ol qarjyny ne maqsatta paidalanady? Nege biz sol jaǵyn aitpaimyz? Erteń halyq ta aqshanyń qaida jumsalǵanyn, kimniń qaltasyna ketkenin suraidy. Ony basshylar taǵy da bonýs qylyp ózderiniń qaltasyna salatyn shyǵar?! Munyń bárin kórip jatyrmyz ǵoi. Nege sonyń aldyn almaimyz?", — dep qapalandy depýtat.
