Qazaqstanda ókpe qabynýynan qaitys bolǵandar sany 1,9 ese artyp otyr. Bul týraly QR Densaýlyq saqtaý vitse-ministri Ajar Ǵiniiat aitty, dep habarlaidy "Ult aqparat".
«Ókpe qabynýymen aýyrǵan adam sanyn jasyryp otyrǵan joqpyz. Ol elektrondy júiede tur. 1 qańtardan 2 tamyzǵa deiin aýyrǵandardyń sany 3,3 ese ósti. Al qaitys bolǵan adamdardyń sany 1,9 ese artyp otyr», - dedi ol Ortalyq kommýnikatsiialar qyzmetindegi baspasóz máslihaty barysynda.
Osy rette Ajar Ǵiniiat ókpe qabynýynan qaza tapqandardyń nelikten statistikaǵa qosylmaǵandyǵyn túsindirip ótti.
«Óitkeni, 1 tamyzǵa deiin ókpe qabynýy búkil dúniejúzi qoldanatyn aýrýlardyń halyqaralyq jiktemesine sai pnevmoniia aýrýy retinde jiktelgen. Sóitip elektrondy júiege túsip ketti. Árbir dáriger ózi emdegen naýqasyn jiktep, júiege salyp otyrady. Al qazir dárigerler kóptegen aýrýdy emdep, endi-endi ál jinap jatyr desem, ótirik emes», - dedi vitse-ministr.
Onyń dereginshe, 2019 jyldyń 1 qańtary men 2 tamyz aralyǵynda elimizde ókpe qabynýynan 2 033 adam qaitys bolǵan. Al osy jyldyń dál osyndai kezeń ishinde 4 042 adam ómirden ozǵan.
