Ońtústik Qazaqstan oblysyndaǵy 1510 bilim berý mekemesi men 896 densaýlyq saqtaý nysandary jylý berý maýsymyna 100 paiyz daiyn, dep habardy ákimniń baspasóz qyzmeti.
Bul týraly búgin OQO Óńirlik kommýnikatsiia qyzmetinde ótken baspasóz konferentsiiasynda oblystyq energetika jáne turǵyn úi-kommýnaldyq sharýashylyq basqarmasynyń basshysy Marǵulan Maraiym málim etti.
Onyń aitýynsha, óńirde sonymen qatar 803 áleýmettik, 723 mádeniet mekemesi, 61 sport nysany men jumyspen qamtý salasyndaǵy 19 mekeme qys merzimine tolyq ázirlikten ótken. Al oblystaǵy 3209 biýdjettik mekeme 176,9 myń tonna qatty jáne 5,8 mln litr suiyq otynmen qamtamasyz etilgen.
«Búgingi tańda oblysymyzdaǵy ortalyqtandyrylǵan jylýmen qamtamasyz etiletin 2327 kópqabatty turǵyn úidiń 2094-i qysqa maýsymǵa daiyndyqtan ótken. Qalǵan 233 úidi 1 qarashaǵa tolyq daiyndaý josparlanyp otyr. Sondai-aq, jylý energiiasyn óndirýshi kásiporyndarǵa qatty otyn qory kestege sáikes tasymaldanýda», - dedi M.Maraiym.
Sondai-aq baspasóz konferentsiiasynda Shymkent qalasynyń jylý berý maýsymyna daiyndyq barysyn baiandaǵan qala ákiminiń orynbasary Beisenbek Janbosynov ortalyqtandyrylǵan jylý júiesine qalanyń 1811 kópqabatty úileri qosylǵanyn atap ótti. Spikerdiń málimdeýinshe, atalǵan kópqabatty turǵyn úilerdiń búgingi tańda 1610-ny jylý maýsymyna daiyn. Al, qalǵan tutynýshylar jylý maýsymyna deiin daiyndyq jumystaryn aiaqtaidy.
Búgingi tańda qalanyń ońtústik bóligindegi diametri 1000 mm jylý júiesi tolyǵymen sýǵa toltyrylsa, erteńnen bastap qalanyń ońtústik bóligindegi magistraldyq jáne ishki oramdyq jylý júielerin sýmen toltyrý jumystary bastalady eken. Al qalanyń soltústik bóligindegi jylý júielerine qazan aiynyń 1-nen bastalady.
Oblystaǵy biýdjettik mekemeler men kópqabatty turǵyn úilerge jylý berý arnaiy bekitilgen erejege sáikes júrgiziletin bolady. Iaǵni, syrtqy aýa temperatýrasynyń ortasha kórsetkishi 5 táýlik boiy +5°S jáne odan tómen bolsa, jylytý maýsymyn bastaý týraly sheshim qabyldanady.
Aita keteiik, búgin Ońtústik Qazaqstan oblysynyń ákimi J.Túimebaevtyń tóraǵalyǵymen ótken selektorlyq jiynda oblystyń 2017-2018 jyldardaǵy jylý berý maýsymyna daiyndyq barysy qaralǵan bolatyn.
Onda ákim qys merzimine daiyndyq jumystary boiynsha apta saiyn turaqty túrde monitoring júrgizip, baqylaýǵa alý qajettigin aityp, tiisti sala basshylaryna naqty mindettemeler júktedi.
