Ońtústik Qazaqstan oblysynyń kásipkerleri eksportqa jańa taýar túrlerin shyǵarýdy qolǵa aldy. Jyl basynan beri oblys kásiporyndarynyń eksportqa shyǵarǵan ónimderiniń quny 700 mln AQSh dollaryna jetken. Bul týraly óńirdiń kásipkerlik basqarmasynyń basshylyǵy málimdedi, dep habarlaidy Ult.kz tilshisi QazAqparat agenttigine silteme jasap.
Osyǵan deiin ońtústik óńirinen eksportqa shyǵatyn taýarlar tek azyq-túlik, maqta-mata jáne aýylsharýashylyq ónimderi ǵana bolsa, endigi jerde zamanaýi tehnologiia qoldanyp óndiriletin ónim túrleri de kóbeiip otyr.
Bul tizimdi endi ortopediialyq qural-jabdyqtar, kilemder men jańasha jasalǵan plitalar tolyqtyrýda. Dál qazir Resei, Tájikstan, Qyrǵyzstan jáne Eýropa elderine eksportty ulǵaitý máselesi qaralyp otyr. Máselen, Shymkentten shyǵarylatyn vakýýmdyq tútiksheler Eýropada saýdalanady. Bul qazir óńirge birshama jańa eksporttyq taýar túri bolyp otyr. Sala mamandarynyń sózinshe, eksportqa ónim shyǵarýdy óristetýde memlekettik qoldaýdyń naqty kómegi kóp. Qazirgi tańda kásipkerlerge «Eksport shyǵarýshy-2020» baǵdarlamasyna qatysý usynylyp, ózge de eksportty qoldaý men óristetýge baǵyttalǵan baǵdarlamalar jasalyp otyr.
«Eger óndiris orny jańashyldyq tásilmen ónim óndirip, ol ónim eksportqa shyǵatyn bolsa, biz ákimdik tarapynan barlyq jaǵdai jasaýǵa daiynbyz. Sol úshin de bizde arnaiy ekonomikalyq aimaq bar. Ol jerde óndirilgen ónimder barlyq salyq túrinen bosatylǵandyqtan, bastapqy baǵa tómen bolyp, eksportqa tiimdi baǵada saýdalaýǵa múmkindik týady», - deidi oblystyq ónerkásip basqarmasynyń bóliminiń basshysy Hikmat Raiymbekov.
