Ońtústik Qazaqstan oblysy Saryaǵash aýdany Abai aýylynda zorlandy delingen 7 jasar balanyń isine qatysty sheneýnikter jumystan qýyldy. Bul týraly OQO ákimi Shymkentte ótken otyrys kezinde málimdedi, dep habarlaidy Baq.kz tilshisi.
«Saryaǵash aýdany jergilikti politsiia qyzmetiniń bastyǵy Berdaly Orazgeldiev qyzmetinen bosatyldy. Ideologiia boiynsha oblys ákiminiń orynbasaryna, Saryaǵash ákimine – qatań sógis. Ońtústik Qazaqstan oblystyq bilim basqarmasy basshysy Isatai Saǵyndyqovqa da sógis berildi», - dedi Túimebaev.
Buǵan deiin qazaqstandyq qoǵam belsendileri men erikteler jinalyp, jeti jasar balany Almatyǵa aparyp, táýelsiz saraptama jasaýdy uiymdastyrdy. Bul úshin Ońtústik Qazaqstan oblysyna arnaiy advokat kelip, jábirlenýshini qorǵaýyna aldy. Osylaisha 14 naýryz kúni keshkisin saǵat 20:17-de jábirlenýshi bala, ájesi men ápkesi, resmi ókili – tórteýi Shymkent temirjol vokzalynan Almatyǵa poiyzban júrýi tiis bolatyn. Biraq saǵat 20:00 shamasynda balanyń ápkesi men resmi ókili jýrnalisterge habarlasyp, olardy poiyzǵa mingizbei, ustap qalyp, bir top politseidiń OQO ishki ister departamentine kúshtep áketip bara jatqanyn habarlady.
Sodan keiin OQO ishki ister departamentiniń ǵimaratynda ustalyp otyrǵan jábirlenýshi bala, ájesi men ápkesine onyń resmi ókili Dinmuhammed Artyqov pen qorǵaýshysy Baýyrjan Azanov kirgizildi. Ishten shyqqan resmi ókil balanyń Shymkenttegi kámeletke tolmaǵandardy beiimdeý ortalyǵyna jiberilgeli jatqanyn habarlady.
Saǵat túngi on jarymdar shamasynda jeti jasar balanyń qaýipsizdigin qamtamasyz etý týraly qaýly qabyldanǵany jóninde habarlama taratty.
Resmi habarlamada «Shymkent temir jol vokzalynda balanyń ájesimen áńgime júrgizildi. Olarǵa memleket tarapynan beriletin qorǵaýǵa alý quqyǵy boiynsha tergeýshi qaýlysynyń qajettiligi týraly túsindirildi. Sodan keiin balanyń ájesi memleket tarapynan beriletin qorǵaýdy paidalaný quqyǵyn qoldaný týraly sheshim qabyldady», - dep jazylǵan.
Izinshe OQO ishki ister departamentiniń baspasóz hatshysy Saltanat Qaragózova balanyń «kámelet jasyna tolmaǵandardy beiimdeý ortalyǵyna jetkizilgenin málimdedi».
Jábirlenýshilerdiń resmi ókili Qurmanǵazy Músir kámelet jasyna tolmaǵandardy beiimdeý ortalyǵyna baryp, balanyń onda joq ekenin habarlady.
«Balanyń ápkesimen sóilestim. Olardy bizden jasyryp ustap otyr. Sol fakt boiynsha endi politseilerge baryp, bizden olardy alyp ketip, jasyrǵany úshin aryz ótkizemiz», - dedi Qurmanǵazy Músir.
Bala quqyǵy jónindegi Zaǵipa Balieva balanyń jáne onyń janyndaǵy ájesi men ápkesiniń psihologpen birge jaldamaly páterge ornalastyrylǵanyn aitty.
Eske salsaq, 12 naýryz kúni qazaqstandyq buqaralyq aqparat quraldarynda «Abai aýylyndaǵy mektepterdiń birinde 7 jasar balany joǵary synyp oqýshylary birneshe ret zorlaǵan» degen aqpar tarady. Jeti jasar balanyń ájesi bul týraly aýdandyq ishki ister organdaryna habarlanǵanyn, biraq tergeý sharalarynyń jetkilikti júrgizilmei kele jatqanyn aitty.
Sodan keiin keshkisin OQO Ishki ister departamenti «Saryaǵash aýdanyndaǵy kámelettik jasqa tolmaǵan 7 jasar balaǵa qatysty mektep oqýshylarynyń ony urǵany jáne zorlaǵany jónindegi derek boiynsha Qylmystyq kodeksiniń 121-babynyń 4-bóligimen Saryaǵash aýdandyq IIB PB qylmystyq is qozǵap, tergeý júrgizip jatyr. Tiisti saraptamalar taǵaiyndalǵan. Qylmystyq istiń tergeýine qatysty qalǵan málimetter tergeý qupiiasy bolǵandyqtan, jariialanbaidy. Istiń tergelýi OQO IID basshylyǵynyń jeke baqylaýynda», - dep habar taratty.
Al Ońtústik Qazaqstan oblysynyń prokýratýrasynyń habarlaýynsha, tergeý aiasynda sot psihologiialyq-psihiatriialyq saraptamalar taǵaiyndaldy.
«Olardyń qorytyndylary áli daiyn emes. Nátijesi boiynsha Astana qalasynda arnaiy mamandardyń qatysýymen keshendi sot-meditsinalyq saraptamasy júrgiziledi», - delingen habarlamada.
Bul oqiǵa Qazaqstan qoǵamynda úlken daý týǵyzyp, áleýmettik jelilerde keńinen talqylanyp jatyr.
