«Nur Otan» partiiasy Ońtústik Qazaqstan oblystyq filialynda ziialy qaýym taǵy da bas qosty. Basty taqyryp «Memlekettik tildi latyn qarpine kóshirý jáne álipbidiń biryńǵai standarttaryn talqylaý». Bul jolǵy qoǵam talqysyna túsken máseleni «Miras» qoǵamdyq keńesiniń músheleri de ortaǵa saldy, dep habarlaidy Ult.kz tilshisi QazAqparat agenttigine silteme jasap.
Basqosýda latyn qarpine kóshý ýaqyt talaby ekenin aitqan ziialy qaýym ókilderi ultymyzdyń asyl tiregi-ana tilimizdiń bolashaǵy úshin jasalǵan shara dep otyr. Olardyń sózinshe, qazaq jazýyn jańǵyrtý tereń izdenister men zertteýlerdi qajet etetin sharýa. Sol sebepti kóshbasshy partiia ókilderi álipbige qatysty bastamany biraýyzdan qoldaýǵa shaqyrdy.
«Memleket bul protsestiń ótýin qiyndatpaý maqsatynda jáne elimizdiń árbir azamaty úshin barlyq qajetti sharalardy qolyna alady. Bizdiń oiymyzdy oblystyq «Miras» qoǵamdyq keńesi de qyzý qoldap otyr. Qazaq halqynyń latyn álipbiine ótýin qoldai otyryp, barlyq Qazaqstandyqtardy jáne árbir tulǵany Elbasynyń bolashaq urpaqtyń qamy úshin jasap jatqan is-áreketin qoldaýǵa shaqyramyz», - dedi «Nur Otan» partiiasy OQOF tóraǵasynyń birinshi orynbasary Nurmahan Joldasov.
Jalpy, latyn álipbiinde 26 árip bar bolsa, bul álemniń ozyq memleketteri qoldanyp kele jatqan standart sanalady. Al, qazaq halqynyń ereksheligine qarai 8 dybys qos árippen jazylady degen tujyrym qarastyrylyp jatyr. Bul ózgeris n men ń -dy ú men u-ny ajyrata almaityn keibir azamattarǵa qazaq tilin úiretýge zor múmkindik deidi ǵalymdar.
«Túrki tildes Ázirbaijan memleketi 1990-shy jyldarda- aq latyn qáripine toqtalǵan. Al kórshiles Ózbekstan 1993-shi jyldan beri latynsha jazyp, syzady. Qazaqstan áliptiń artyn baǵyp bul ózgeriske baiyppen qadam jasady. Latyn qáripine ótkende ózgeler jibergen qatelikterge boi aldyrmaý kerek»,-deidi Ońtústik Qazaqstan memlekettik pedagogikalyq institýttyń dotsenti Qairat Anarbaev.
Qazaq eliniń jazýy sońǵy 77 jylda 4 ret ózgergen eken. Sonyń saldarynan rýhani qundy jazbalardyń bazbiri joiylyp ketti. Jiynǵa qatysqan tarihshylar álipbidiń ózgerýi áleýmetke ońai soqpaitynyn mysaldarmen keltirdi. Degenmen Elbasy muryndyq bolǵan joba elimizdi jańa biikterge jeteleitin quptarlyq is dep túiindedi.
