Búgin Ońtústik Qazaqstan oblysynyń ákimi Janseiit Túimebaevtyń tóraǵalyǵymen oblys ákimdiginde selektorlyq májilis ótti. Kún tártibinde negizgi úsh másele qaraldy. Sonyń biri – aimaqtyń 2017 jyldyń 8 aiyndaǵy áleýmettik-ekonomikalyq damý qortyndysy boldy. Bul týraly oblystyq ekonomika jáne biýdjetti josparlaý basqarmasynyń basshysy Arman Sábitov baiandama jasap, saladaǵy atqarylǵan jumystarǵa esep berdi, dep habarlaidy "Ult aqparat".
Onyń aitýynsha oblysymyzdaǵy ónerkásip óniminiń kólemi 510,1 mlrd. teńgeni qurap, ótken jyldyń sáikes kezeńimen salystyrǵanda 0,2 paiyzǵa artqan. Al, óńdeý ónerkásibi óniminiń kólemi 353,0 mlrd. teńgeni qurap, 2,4 paiyzǵa ósip otyr. Jyldyń qorytyndysymen ken óndirý ónerkásibi óniminiń kólemi 200 mlrd. teńgeni quraǵan.
«Oblysymyzda jeńil ónerkásip – 5,2 paiyzǵa, mashina jasaý – 32,7, himiialyq ónerkásip – 17,3, metallýrgiia – 17,0, ózge metall emes mineraldyq ónimder – 14,8, farmatsevtikalyq ónimder – 12,1, tamaq ónimderin óndirý – 8,4 paiyzǵa artyp otyr. Jyldyń qorytyndysymen óńdeý ónerkásibi óniminiń kólemi 570 mlrd. teńgeni quraidy degen jospar bar», - dedi Arman Sábituly.
Biyl oblysqa 266,0 mlrd. teńge investitsiia baǵyttalyp, 2016 jyldyń tiisti kezeńimen salystyrǵanda 21,8 paiyzǵa artqan. Al, aýyl sharýashylyǵynyń jalpy ónim kólemi 257,4 mlrd. teńgeni qurasa, mal sharýashylyǵynda mal basynyń sany ortasha eseppen 5,5 paiyzǵa kóbeigen. Sondai-aq, et óndirisi – 5,1, sút - 2,0, jumyrtqa – 9,1 paiyzǵa ósken.
Oblys ákimi joǵaryda atalǵan salalar boiynsha tómen kórsetkish kórsetken aýdan, qala basshylarynyń jumysyn jandandyrý qajettigin eskertti.
«Syrtqy investitsiia tartýdy jandandyrý qajet. Sonymen qatar basqarma basshylary men aýdan, qala ákimderi 2017 jylǵa josparlanǵan indikatorlardyń tolyq oryndalýyn qamtamasyz etip, indikatorlardyń oryndalýy týraly aqparatty ai qorytyndysymen ekonomika jáne biýdjettik josparlaý basqarmasyna usynýdy tapsyramyn», - dedi Janseiit Túimebaev.
Májilis barysynda oblystyq biýdjettiń igerilý barysy da talqylandy. Bul týraly oblystyq qarjy basqarmasy basshysynyń mindetin atqarýshy Raqymberdi Múlkemanov baiandama jasap, jyl sońyna deiin tiisti qarjylardyń igerilý qajettigine toqtaldy. Bul rette oblys basshysy jergilikti biýdjeti igerý maqsatyndaǵy jumystardy jetildirip, naqty jospar qurýdy júktedi.
