Ońtústik Qazaqstan oblysynda salyq tóleýshilerge ońtaily jańa Salyq kodeksiniń jobasy túsindirý boiynsha óńiraralyq kóshpeli seminar ótti. Basqosýǵa Qazaqstannyń salyq tóleýshiler qaýymdastyǵynyń keńesiniń tóraiymy Janat Ertilesova men keńesshiler, QR Ulttyq ekonomika ministrligi Salyq jáne keden saiasaty departamentiniń direktory Azamat Amrin qatysty, dep habarlaidy QazAqparat tilshisi.
Jiynǵa sondai-aq, QR QM Memlekettik kirister komiteti tóraǵasynyń orynbasary Arǵyn Qypshaqov bastaǵan mamandar jáne ýákiletti organdardyń ókilderi, Ońtústik Qazaqstan, Jambyl jáne Qyzylorda oblysynyń salyq tóleýshileri men Memlekettik kirister departamentteriniń basshylary jáne qyzmetkerleri de arnaiy shaqyryldy.
Qazaqstannyń salyq tóleýshiler qaýymdastyǵynyń keńesiniń tóraiymy Janat Ertilesovanyń tóraǵalyǵymen ótken seminarda Ulttyq ekonomika ministrligi, salalyq ministrlikter, «Atameken» kásipkerler palatasy, QR Memlekettik kirister komiteti jáne biznes qaýymdastyqpen birlese ázirlegen jańa Salyq kodeksiniń jobasy jumys tobynyń mamandarmen tanystyrylyp, talqyǵa salyndy.
Jiynda sóz sóilegen Ertilesova jańa Salyq kodeksindegi ózgerister salyq salý ideologiiasyn ózgertip, salyq tóleýshilerdi qorǵaý men ekonomikanyń mańyzdy salalaryn yntalandyrýǵa baǵyttalǵanyna nazar aýdara otyryp, jumys tobynyń kásibi mamandary jańa kodekstegi árbir ózgeris boiynsha toqtala túsindiretinin aitty.
Atap aitqanda, joba azamattardyń salyqty óz erkimen tóleýge yntalandyratyn bolady. Barlyq túsiniksiz baptar salyq tóleýshiniń paidasyna sheshilip jáne salyqtyq daýlardy ádil qaraýǵa múmkindik bermek. Sondai-aq, jańa Salyq kodeksi jobasy ondaǵy baptar oqyǵanǵa jeńil jáne túsinikti bolýyn kózdeidi.
Óz kezeginde, QR QM Memlekettik kirister komiteti Tóraǵasynyń orynbasary Arǵyn Qypshaqov sóz alyp, jańa Salyq kodeksiniń jobasy boiynsha salyq tóleýshi salyq organynyń túsindirýine sáikes áreket etken jaǵdaida, aiyppuldar men ósimpuldardy qoldanbaý usynylatynyń jetkizdi. Sonymen qatar, salyqtyq tekserý aktilerinde tiisti negizdemelerdiń bolýy kózdelgeni týraly aitty.
Shara barysynda, salyq tóleýshilege jańa jobada shaǵyn jáne orta biznesti damytý úshin qoldanystaǵy arnaiy salyq rejimderi saqtalyp, shyǵystardy esepke alý arqyly jeńildikter berý qarastyrylǵany aityldy. Sondai-aq, jańa joba boiynsha endi azamattar kásip bastaýy úshin tirkeýsiz, kásip bastaǵany týraly memlekettik kirister organyna eskertip habarlandyrý jiberedi. Habarlamany alǵan salyq qyzmetkerleri bir jumys kúninde kásipti tirkeidi.
Basqosýda jumys tobynyń músheleri jańa kodekstegi basqa da ózgerister týraly túsindirdi. Atap aitqanda, jańa Salyq kodekste agrarlyq sektorǵa yntalandyrý sharalary da usynylǵan. Jobada sharýa-fermer qojalyqtarynda, músheleri men jumysshylaryna salynatyn áleýmettik salyqty alyp tastaý usynylǵan. Sondai-aq biryńǵai jer salyǵyn tóleýshiler qosylǵan qun salyǵyn tólemeidi. Aýyl sharýashylyǵy ónimderin óndirýshiler úshin qosylǵan qun salyǵy boiynsha jeńildikter, dúniejúzilik saýda uiymynyń talaptaryna sáikes, ishki óndiris taýarlary jáne import úshin salyq salýdyń teń sharty qoldanylýy tiis talabyna bailanysty joiylady.
Sonymen qatar, QR QM Memlekettik kirister komitetiniń jumys toby investitsiialyq jobalarǵa salyq salý, keibir jeńildikter alynýy týraly ózgeristerdi túsindirdi.
Seminar sońynda salyq tóleýshiler tarapynan jańa Salyq kodeksiniń jobasymen tanysý barysynda týyndaǵan kókeitesti suraqtarmen usynystar berildi. Kelip túsken suraqtardyń basym bóligi elektrondy shot-faktýralary, mindetti áleýmetti meditsinalyq saqtandarý, salyqtyq teserýler, táýkelder basqarý júiesi, qosylǵan qun salyǵy, jer qoinaýyn paidalaný salalaryna qatysty boldy. Óz kezeginde jumys tobynyń mamandary qatysýshylarǵa tolyqqandy jaýaptar berip, usynystar men eskertpelerdi qarap shyǵatyndyqtaryn jetkizdi.
