Ońtústik Qazaqstan oblysynda jastar etnomádeni birlestikterdiń tóraǵalarymen kezdesti. Shymkent agrarlyq kolledji janyndaǵy «Dostyq» klýbynda ótken kezdesýde latyn álipbiine kóshý máselesi sóz boldy, dep habarlaidy QazAqparat tilshisi.
«Rýhani jańǵyrý - zaman talaby» taqyrybynda ótken jiynǵa qatysýshylar Elbasynyń «Bolashaqqa baǵdar: rýhani jańǵyrý» maqalasyn talqylap, oi bólisti. Basqosýda sóz alǵan Ońtústik Qazaqstan oblystyq Qazaqstan halqy assambleiasy tóraǵasynyń orynbasary, korei etnomádeni birlestiginiń tóraiymy Roza Pak latyn grafikasyna kóshýdiń mańyzdylyǵyna toqtaldy.
«Elbasynyń baǵdarlamalyq maqalasy - bizge jańa múmkindikter ashyp, máńgilik el bolýǵa bastaityn mańyzdy qujat. Maqalada basym baǵyt retinde kórsetilgen latyn álipbiine kóshý - elimizdiń alǵa jyljýyna, jańa zaman talabyna sai ósip-órkendeýine úles qosary sózsiz. Jańa álipbi - zamanaýi tehnologiia tilimen úndes. Sondyqtan latyn qarpine kóshý - ýaqyt talaby. Kóshbasshy memlekettermen iyq tiresip, jastarymyz básekege qabiletti bolý úshin ýaqyt kóshinen qalmaýy tiis», - dedi Roza Pak.
Jiyn barysynda oblystyq túrik etnomádeni birlestiginiń tóraǵasy Latifsha Asanov latyn álipbiine kóshý bastamasy túbi bir túrki dúniesiniń mádeni, ǵylymi, ekonomikalyq bailanysynyń nyǵaiýyna mol múmkindik beretinin aitty. Sonymen birge, ózara yntymaǵymyzdy saqtap, eldiń birligin nyǵaitýdyń mańyzyna da toqtaldy.
Kezdesý sońynda qonaqtar stýdentterdiń saýaldaryna jaýap berip, aldaǵy ýaqytta jii júzdesip turýǵa ýaǵdalasty.
