وڭتٷستٸك قازاقستان وبلىسىندا جاستار ەتنومەدەني بٸرلەستٸكتەردٸڭ تٶراعالارىمەن كەزدەستٸ. شىمكەنت اگرارلىق كوللەدجٸ جانىنداعى «دوستىق» كلۋبىندا ٶتكەن كەزدەسۋدە لاتىن ەلٸپبيٸنە كٶشۋ مەسەلەسٸ سٶز بولدى, دەپ حابارلايدى قازاقپارات تٸلشٸسٸ.
«رۋحاني جاڭعىرۋ - زامان تالابى» تاقىرىبىندا ٶتكەن جيىنعا قاتىسۋشىلار ەلباسىنىڭ «بولاشاققا باعدار: رۋحاني جاڭعىرۋ» ماقالاسىن تالقىلاپ, وي بٶلٸستٸ. باسقوسۋدا سٶز العان وڭتٷستٸك قازاقستان وبلىستىق قازاقستان حالقى اسسامبلەياسى تٶراعاسىنىڭ ورىنباسارى, كورەي ەتنومەدەني بٸرلەستٸگٸنٸڭ تٶرايىمى روزا پاك لاتىن گرافيكاسىنا كٶشۋدٸڭ ماڭىزدىلىعىنا توقتالدى.
«ەلباسىنىڭ باعدارلامالىق ماقالاسى - بٸزگە جاڭا مٷمكٸندٸكتەر اشىپ, مەڭگٸلٸك ەل بولۋعا باستايتىن ماڭىزدى قۇجات. ماقالادا باسىم باعىت رەتٸندە كٶرسەتٸلگەن لاتىن ەلٸپبيٸنە كٶشۋ - ەلٸمٸزدٸڭ العا جىلجۋىنا, جاڭا زامان تالابىنا ساي ٶسٸپ-ٶركەندەۋٸنە ٷلەس قوسارى سٶزسٸز. جاڭا ەلٸپبي - زاماناۋي تەحنولوگييا تٸلٸمەن ٷندەس. سوندىقتان لاتىن قارپٸنە كٶشۋ - ۋاقىت تالابى. كٶشباسشى مەملەكەتتەرمەن يىق تٸرەسٸپ, جاستارىمىز بەسەكەگە قابٸلەتتٸ بولۋ ٷشٸن ۋاقىت كٶشٸنەن قالماۋى تيٸس», - دەدٸ روزا پاك.
جيىن بارىسىندا وبلىستىق تٷرٸك ەتنومەدەني بٸرلەستٸگٸنٸڭ تٶراعاسى لاتيفشا اسانوۆ لاتىن ەلٸپبيٸنە كٶشۋ باستاماسى تٷبٸ بٸر تٷركٸ دٷنيەسٸنٸڭ مەدەني, عىلىمي, ەكونوميكالىق بايلانىسىنىڭ نىعايۋىنا مول مٷمكٸندٸك بەرەتٸنٸن ايتتى. سونىمەن بٸرگە, ٶزارا ىنتىماعىمىزدى ساقتاپ, ەلدٸڭ بٸرلٸگٸن نىعايتۋدىڭ ماڭىزىنا دا توقتالدى.
كەزدەسۋ سوڭىندا قوناقتار ستۋدەنتتەردٸڭ ساۋالدارىنا جاۋاپ بەرٸپ, الداعى ۋاقىتتا جيٸ جٷزدەسٸپ تۇرۋعا ۋاعدالاستى.
