Ońtústik Qazaqstan oblystyq bilim basqarmasy «Týǵan jer» baǵdarlamasy aiasynda jas ólketanýshylardyń saiysy ótti. Sý týrizmin damytý maqsatynda uiymdastyrylǵan "Aq jelken" jarysyna 150 oqýshy men 50-ge jýyq maman qatysty, dep habarlaidy QazAqparat tilshisi.
Elbasy N. Nazarbaevtyń "Rýhani jańǵyrý: Bolashaqqa baǵdar" maqalasy aiasynda uiymdastyrylǵan saiys Báidibek aýdany, Arys ózeni boiynda ótti. Onda oqýshylar sýda qaiyqpen júzýden eptilikterin baiqatyp, sheberlikterin shyńdady. Sporttyq, tehnikalyq jáne taktikalyq jaǵynan myqtylyqtaryn baiqatty. Saiysqa qatysqan oqýshylardyń biri Kórkemjan Qonysbai sporttyń sýda júzý túrine qyzyǵatyn balǵyndar sanynyń kóptigin aitady.
«Men Shymkentten keldim. Sý sportyna qatty qyzyǵamyn. Biz munda tek jarysyp qana qoiǵan joqpyz, qutqarý tásilderin úirendik, eptilikterimizdi tanyttyq», - deidi Kórkemjan Qonysbai.
Jalpy, jiynǵa qatysýshy balǵyndar munda tek jarysyp qana qoimai, tórt kún boiy dalaly jaǵdaida ómir súrýdiń de qyr - syrlarymen qanyqty. Sýdan qutqarý men odan ózge de sporttyq- tehnikalyq sheberlikterin shyńdady. «Jalpy, jiyn óz maqsatyna jetti dep oilaimyn. Iaǵni, oqýshylarǵa jalpy sý sporty jaiynda jáne dala týrizmi jaily maǵlumat berip, sony is júzinde kórsetip, tanystyrdyq. Sóitip balǵyndardy qyzyqtyra alǵandaimyz.
Al sodan keiin sý sportyn tańdaý da olardyń óz erikterinde», - deidi Oblystyq jas týrister stantsiiasy MKQK direktory Sáýle Ómirbaeva.
Jarystan keiin jas týrister Báidibek aýdanynyń ortalyǵy Shaian aýylyn aralap, ondaǵy 150 orynǵa laiyqtalǵan orta mektebinde boldy. Júzimdik aýylyndaǵy mektepten ashylǵan jańa sport zaly men tennis kordyn, oiyn alańshalaryn kórip shyqty.
