Ońtústik Qazaqstan oblysynda túrkiialyq investorlarmen quny 12 mln. AQSh dollary bolatyn eki joba júzege aspaq, dep habarlaidy "Ult aqparat" aimaq basshysynyń baspasóz qyzmetine silteme jasap.
Mundai kelisimge túrik biznes–qurylymdarynyń jetekshileri bastaǵan delegatsiianyń Astana qalasyna jasaǵan jumys sapary kezinde qol jetkizilip otyr.
Qazaqstanǵa jasaǵan sapary kezinde elordamyz - Astanada «Ońtústik» indýstrialdy aimaqtardyń basqarýshy kompaniiasy men túrkiialyq biznesmender arasynda quny 12 mln. AQSh dollaryn quraityn investitsiialyq eki qujatqa qol qoiyldy.
Kúngeidegi qazaq-túrik indýstrialdy aimaǵynda osy jyly iske asyrylatyn jobanyń biri - qorǵasyn kontsentratyn óndiretin túrkiialyq Merkez Asia Madencilik kompaniiasynyń zaýyty (quny 2 mln. AQSh dollary) bolsa, ekinshisi - quny 10 mln. AQSh dollary bolatyn Petronet Otomosyon kompaniiasynyń janar-jaǵarmai taratý kolonkalaryn shyǵaratyn zaýyty.
Búginde aýmaǵy 50 gektardy alyp jatqan «Qazaq-túrik» indýstrialdy aimaǵynda jalpy quny 37,5 mln. AQSh dollaryn quraityn 8 joba júzege asyrylýda. Atalǵan jobalar iske qosylǵanda jańa 900 jumys orny qurylady dep josparlanýda.
Aita keteiik, jyl sońyna deiin atalǵan indýstialdy aimaqta «Gold Aluminum» JShS-niń PVH profilderi men PVH jáne aliýminiiden jasalǵan móldir konstrýktsiialardy óndiretin shaǵyn tsehy iske qosylady.
Eske salsaq, 9 qyrkúiek kúni Qazaqstan Respýblikasynyń Premer-Ministri Baqytjan Saǵyntaevtyń Túrkiianyń biznes qurylymdarynyń ókilderimen kezdesýi ótken bolatyn.
