Kezinde almanyń aport sortyn ósirip, óńdeýmen ainalysqan Túlkibas aýdanynyń baǵbandary bul isti qaita qolǵa alyp otyr. Endi olar Túlkibastyń brendi bolatyn alma baý sharýashylyǵyn damytý maqsatyndaǵy jumystardy shiratýda, dep habarlaidy "Ult aqparat" Ońtústik Qazaqstan oblysy ákimdiginiń baspasóz qyzmetine silteme jasap.
Máselen, aýdanda sońǵy 3 jylda sharýalardyń alma egýge degen qyzyǵýshylyqtary artqan, iaǵni, olar bos jatqan 814 ga jerge alma baý egip, memleketten beriletin sýbsidiiaǵa qol jetkizgen. Al, biyl olar 355 ga jerge alma baý otyrǵyzdy. Onyń ishinde 122 gektary qarqyndy baý.
Túlkibastyq sharýalar kúzgi terim jumystaryn ýaqytyly júrgizip, baý-baqshalardan 24 myń tonnadan astam alma jinady. Jinalǵan almalardyń basym kópshiligi arnaiy qoimalarda saqtalsa, qalǵany elimizdiń ózge aimaqtarynda satylymǵa shyǵarylýda. Ásirese aýdandaǵy eń iri «Kóktal» jáne «Ken-taý» sharýashylyqtary 5970 tonna alma jinaǵan.
Jalpy Túlkibas aýdany taýly aimaqta ornalasqan. Aýa raiy qońyr salqyn, alma-baý jemis aǵashtaryn ósirýge óte qolaily aimaq bolyp esepteledi. Búgingi tańda aýdandaǵy barlyq jemis aǵashtarynyń kólemi 3115 gektardy qurap otyr. 2020 jylǵa deiin aýdan kóleminde alma-baý kólemi 3600 gektarǵa jetkizilip, onyń ishinde aýdanda qarqyndy baýlardy ósirý damytylyp, ónim kólemin ulǵaitý josparlanýda.
Aita keteiik, keshe ǵana Ońtústik Qazaqstan oblysynda dándi daqyldardy jinaý jumystary tolyǵymen aiaqtalǵany habarlanǵan. Biyl oblys diqandary astyq ósirýde de ozyq tehnologiialardy, onyń ishinde tereń qopsytý ádisin qoldanýdyń arqasynda mol ónimge qol jetkizdi. Máselen, oblys boiynsha 258,8 myń gektar jerge egilgen dándi daqyldan sharýalar 589 myń tonna ónim alǵan.
