Ońtústik Qazaqstan oblysy Maqtaral aýdanyndaǵy Jańa aýyl eldi mekeninde 180 balaǵa arnalǵan jańa balabaqsha paidalanýǵa berildi. "Týǵan jer" baǵdarlamasy aiasynda salynǵan mektepke deiingi mekemeni jergilikti kásipker Bahtiiar Qazybaev Elbasynyń bastamasyna qoldaý retinde jáne týǵan jerdi túletý maqsatynda ashyp otyr, dep habarlaidy "Ult aqparat" QazAqparat agenttigine silteme jasap.
Kásipkerdiń aitýynsha, balabaqshanyń qurylysyna 124 mln teńge qarjy jumsalǵan. Endi 6 topta tárbielenetin 180 bala memlekettik tilde bilim alady. Sondai-aq, aýyldaǵy 24 adam turaqty jumysqa tartylyp otyr.
"Balabaqsha salyp, paida tabýdy kózdep otyrǵan joqpyn. Elbasy usynǵan "Týǵan jer" baǵdarlamasyn júzege asyrýdy ózime borysh ári qurmet dep sanaimyn. Aýyl balalary jastaiynan boiyna patriottyq tárbieni sińirip, erteń elimizdiń órkendeýine úles qosatyn sanaly azamat bolyp qalyptasýyna yqpal etsem deimin" - dedi Bahtiiar Qazybaev.
Bilim berý mekemesiniń ashylý saltanatyna Maqtaral aýdanynyń ákimi Ǵalym Ismailov, oblystyq Qazaqstan halqy Assambleiasy tóraǵasynyń orynbasary Muratáli Qalmuratovtar qatysyp, turǵyndardy jańa balabaqshanyń ashylýymen quttyqtady. Munan soń qonaqtar aýyl turǵyndarymen birge balabaqsha ǵimaratyn aralap kórip, toptardyń jumysymen tanysty. Sondai-aq, balalardyń ázirlegen kontserttik nómirlerin tamashalady.
Aita keteiik, zamanaýi úlgide salynǵan balabaqsha ǵimaraty ashana, kontsert zaly siiaqty t.b. bilim berýge qajetti qural-jabdyqtardyń barlyǵymen qamtylǵan.
