Ońtústik Qazaqstan oblysyndaǵy «Asia Trafo» JShS-i qýattylyǵy 110-120 kVt bolatyn joǵary kerneýli transformator shyǵarýdy qolǵa alǵaly otyr. 2016 jyldan bastap salyna bastaǵan nysandy iske qosý jumystary 2018 jyldyń ekinshi toqsanyna josparlanǵan, dep habarlaidy "Ult aqparat" OQO ákiminiń baspasóz qyzmetine silteme jasap.
«Tassai» indýstrialdy aimaǵynda ornalasqan qurylys jobasynyń barysymen Ońtústik Qazaqstan oblysynyń ákimi Janseiit Túimebaev arnaiy tanysyp, atqarylyp jatqan jumystarǵa oń baǵasyn berdi.
«Aldaǵy jyly zaýyt iske qosylsa, 220 adamdy jumyspen qamtýǵa múmkindik týady. Bul óte jaqsy dúnie. Eń bastysy – qazirgi tańda kásiporynda atqarylyp jatqan jumystarǵa oń baǵa berýge bolady. Sondyqtan jumysty josparly túrde júrgizip, zaýytty erterek iske qosýǵa mán bergen jón»,- dedi J. Túimebaev.
Aita keteiik, kásiporyn kásipkerlikti qoldaý kartasynyń aiasynda júzege asyrylýda. Al joba quny 17,5 mlrd. teńgeni quraidy. Zaýyt jylyna 120 transformator shyǵarýǵa qaýqarly.
Zaýyt ónimderi Qazaqstan men TMD elderiniń suranasyn qanaǵattandyrady dep kútilýde. «Óndiriletin ónim sheteldik kásiporyndarǵa shynaiy básekelestikke tótep bere alady»,- deidi mamandar. Sonymen qatar «Asia Trafo» JShS óz ónimderiniń 50 paiyzyn TMD elderine eksporttaýdy josparlap otyr. Zaýytta «High volt», «Knutch» (Germaniia), «Tuboly astronic», «Mika fluit» (Shveitsariia), «Hikon» (Horvatiia) jáne basqa (Túrkiia, Qytai) firmalarynyń jabdyqtaryn qoldanatyn bolady.
