Búgin Úkimettiń selektorlyq rejimde ótken otyrysynda negizi úsh másele qaraldy. Sonyń biri - sý tasqyny qateriniń aldyn alý sharalary boldy. Atalǵan másele jóninde Ońtústik Qazaqstan oblysynyń ákimi Janseiit Túimebaev baiandama jasap, óńirdegi sý tasqyny qateriniń aldyn alý boiynsha atqarylǵan jumystardy baianlap, birqatar usynystar jasady, dep habarlaidy "Ult aqparat" aimaq basshysynyń baspasóz qyzmetine silteme jasap.
Óńir basshysynyń aitýynsha, oblysta sý tasqynynyń aldyn alý jumystary josparǵa sai júrgizilýde. Qazirgi tańda sý qoimalar men ózen-kólder qadaǵalaýǵa alynyp, ondaǵy jaǵdailar týraly monitornig jumystary jalǵasýda. Degenmen oblysta eń ózekti máselelerdiń biri bolyp, transshekaralyq Syrdariia ózeni men osy ózenniń boiynda ornalasqan shekaralyq kórshiles memleketterdegi sý qoimalaryndaǵy sý mólsheri alańdatyp otyr. Qazirgi tańda berilgen málimetter boiynsha «Toqtaǵul» sý qoimasynda 19,5 miliard tekshe metr sý bolsa, qazirgi jaǵdaida 99 paiyz tolyp tur. Al, «Qairaqumnyń» jobalyq kólemi 3 milliard 800 mln tekshe metr bolsa, qazirgi jaǵdaida 86 paiyzǵa iaǵni 3 miliard 281 mln tekshe metrge tolǵan. Bul «Shardara» sý qoimasyna qaýip týǵyzady. Sebebi, «Shardara» sý qoimasynan sýdy tómen tastaýǵa arnalǵan gidrotehnikalyq júieler jalpy sekýndyna 2 myń 315 tekshe metrge deiin múmkinshiligi bar. Osy máselelerge bailanysty oblys ákimi negizgi tórt usynysyn jetkizdi.
«Birinshiden, ótken jyldardyń tájiribesin eskere otyryp, «Shardara» sý qoimasyn keminde 2018 jyldyń qańtar aiyna deiin tranzittik rejimde ustaýdy usynamyn. Ekinshiden, qaýip tóngen jaǵdaida kórshiles Qyrǵyzstan, Tájikstan, Ózbekstan respýblikalarymen kelisim arqyly kelgen sýdyń mólsherin azaitýǵa jáne Arnasai oipatyna sý tastaý máselesin Úkimet deńgeiinde sheshý qajet. Úshinshiden, «Shardara» sý qoimasynan josparly túrde Qyzylqum oipańyna sekýndyna 2100 tekshe metr aptatty sý tastaý qurylymy qurylysyn salýdy qolǵa alý kerek. Tórtinshiden, qys mezgilinde qaýipti jaǵdai tóngende «Shardara» sý qoimasynan Qyzylorda oblysyna tastalǵan sýdyń mólsherin kóbeitip, retteýdi usynamyn», - dedi Janseiit Qanseiituly.
Oblys ákiminiń bul usynysyna Úkimet basshysy erekshe mán berip, orynbasarlaryna baqylaýda ustaýdy tapsyrdy. Jalpy qazirgi tańda Ońtústik Qazaqstan oblysynda sý tasqyny qaýipi joq.
Aita keteiik, biyl oblysymyzdaǵy tótenshe jaǵdailardyń aldyn alýǵa 1,3 mlrd. teńge qaralǵan. Bul qarjyǵa oblystaǵy qorǵanys bógetteri nyǵaitylyp, 23,2 shaqyrym jańa bóget salyndy.
Budan bólek, 25,6 shaqyrym ózenderdiń jaǵalaýlary bekitilip, 295,2 shaqyrym aryq-kanaldar men 186 birlik sý ótkizý qubyrlary tazalanǵan. Qazirdiń ózinde óńirde 1167 adamy bar quram jasaqtalyp, 304 dana tehnikasy bar kúsh quryldymdarymen kelisim jasalǵan.
