Ońtústik Qazaqstan oblysynda Shardara qalasy kúni toilandy. Aitýly kúni qalaǵa aýyl sharýashylyǵy ónimderiniń jármeńkesi uiymdastyrylyp, ondaǵy taýarlar bazar baǵasynan arzan satyldy. Túrli sporttyq saiystar men kóńildi án keshteri uiymdastyryldy, dep habarlaidy QazAqparat tilshisi.
Jármeńkede Jaýshyqum aýylynyń diqandary 5 tonna piiazdyń ár kelisin 65 teńgeden puldady. Qaltaǵa qonymdy baǵada usynylǵan ónim ainalasy bir saǵattyń ishinde taýsyldy. Sol siiaqty, bolgar buryshynyń kelisi 100 teńge, kartop -100, sábiz - 110, kapýsta - 90, kúrish 160 teńgeden satyldy. Mal sharýashylyǵy jolǵa qoiylǵan aimaqta siyr men qoi eti 1200 teńgege satyldy. Sonymen qatar, balyq ónimderi de jármeńke sóresinen tabyldy.
«Mine ózderińiz kórip otyrsyzdar, Jaýshyqumnan kelgen ónimniń ózi tez arada taýsylyp, qazir taǵy da ákelýge ketti. Basqa da ónimder óte tez ótip jatyr, halyqtyń suranysymenen. Halyq razy barlyǵyna», - deidi Shardara qalasy ákiminiń mindetin atqarýshy Jalǵas Nurymbet.
Mereke aiasynda qala qurylysyna eńbek sińirgen ardagerlerge arnap as berildi. Olar ózderine kórsetilgen qurmetke dán riza. Aitýly shara aýdandyq dene shynyqtyrý jáne sport bólimi uiymdastyrǵan saiystarǵa ulasty. Shardaralyqtar «Alty alash» alańyndaǵy kórmeniń de kýási boldy.
Aita keteiik, Shardara qalasyn úlken týristik ortalyqqa ainaldyrý josparlanyp otyr. Eńbeksúigish halqymen Odaq kóleminde dańqy shyqqan shahar turǵyndarynyń búginde birligi bekem. Aitýly kúnge orai aýdan ónerpazdary kontserttik baǵdarlama usyndy. Kesh sońynda ásem án men tátti kúi kóńilin terbegen qalalyqtar merekelik ot shashýdy tamashalady.
