Biyl Ońtústik Qazaqstan oblysynan Pavlodar, Qostanai, Soltústik Qazaqstan oblystaryna 404 múshesi bar 103 otbasy qonys aýdarǵan. Óńirden kóship barǵan azamattardyń jermen qamtylyp, aýylsharýashylyq jumystarmen ainalysýyna jáne jumyspen, turǵyn úimen qamtamasyz etilýinde eshqandai kedergiler joq. Sondai-aq oblysymyzda «Serpin-2050» baǵdarlamasy aiasynda tegin oqý granttaryna úmitkerlerdiń sany 8 myńǵa jetip otyr. Bul týraly Aqmola oblysynda Úkimet basshysy Baqytjan Saǵyntaevtyń qatysýymen ótken onlain selektorlyq rejiminde Ońtústik Qazaqstan oblysynyń ákimi Janseiit Túimebaev málim etti.
Óńir basshysy óz kezeginde negizgi úsh máseleni kóterdi. Onyń alǵashqysy – ońtústik halqyn soltústik oblystarǵa kóshirý. Bul rette ákim qonys aýdarýshylardyń jol qarajatyn memleket tarapynan tólep berýdi usyndy.
«2014-2016 jyldary ońtústikten 152 otbasy soltústik óńirlerge qonys aýdardy. Aǵymdaǵy jyly Pavlodar, Qostanai, Soltústik Qazaqstan oblystary ákimdikterimen memorandýmdar túzilip, biylǵy jyldyń 20 shildesine 404 múshesi bar 103 otbasy qonys aýdaryp úlgerdi. Áli de kóshkisi keletin otbasylardyń qarasy az emes. Sondyqtan qonys aýdarýshylardyń jolaqasyna memleketten qarjy bólýdi suranamyn. Bul óz kezeginde soltústikke bet alýshy otbasylardyń ynta-jigerin týdyratyny sózsiz»,- dedi Janseiit Túimebaev.
Oblys ákimi qonys aýdarýshylarǵa demeýshilik jasaý maqsatynda jergilikti depýtattar men kásipkerlerdiń atsalysyp jatqanyn baiandady. Alaida ol azdyq etedi degen óńir basshysy soltústikke kóshkisi keletinderge keminde bir ret saparlap baryp, ondaǵy ahýalmen tanysýǵa múmkindik berilý kerek dep esepteidi.
Selektorlyq jiyn barysynda oblys ákimi Aqmola oblysyndaǵy iri kásiporyndardyń biri bolyp tabylatyn «Novopek» kompaniiasyna qajetti 300 mamannyń ázir ekenin baiandady.
Esterińizge salsaq, jyl basynda Aqmola oblysynyń ákimi Málik Mýrzalin Ońtústik Qazaqstan oblysyna jasaǵan sapary aiasynda polietilen qaptaryn shyǵaratyn «Novopek» zaýyty men basqa da óndiristik kásiporyndarda jumys kúshiniń tapshylyǵy sezilip otyrǵanyn aitqan bolatyn. Artynsha eki tarap kelisimge kelip, maman daiarlaýǵa kirisip ketken-tin.
Biyl oblysymyzda «Serpin-2050» baǵdarlamasy aiasynda tegin oqý granttaryna úmitkerlerdiń sany 8 myńǵa jetip otyr. Bul kórsetkishti kemitpei, barlyǵyna birdei grant bólýge úkimet tarapynan qoldaý suraldy.
Aita keteiik, 2016 jyly «Serpin-2050» baǵdarlamsy boiynsha 9 oblystaǵy (Soltústik, Shyǵys, Batys Qazaqstan oblystary, Aqtóbe, Aqmola, Qostanai, Pavlodar, Qaraǵanda, Atyraý oblystary) 22 joǵary oqý oryndaryna 3162 jáne 30 orta arnaýly oqý oryndaryna 1000 respýblikalyq grant bólingen bolatyn. Tarqatyp aitsaq, 2014 jyly 1000 grant bólinip, kúngeilik 326 jas oqýǵa tússe, 2015 jyly 34 kolledjge 1200 grant bólinip, 359 talapker bilimin jalǵastyrdy. Byltyr 31 kolledjge 1000 grant bólinip, óńirimizden 244 jas oqýǵa tústi. Jalpy sońǵy 3 jylda Ońtústikten «Serpin-2050» baǵdarlamasy boiynsha JOO 4698, kolledjderge 929 jas bilim alýda.
2017-jyly Serpin baǵdarlamasy aiasynda JOO 3793 memlekettik grant, al kolledjderge 720 grant bólindi.
23-31 shilde aralyǵynda memlekettik grant iegeri atanýǵa óńirimizdiń jas túlekterinen Serpin jobasyna 7849 qujat tapsyryldy.
Biylǵa JOO-na bólingen granttyń 2500 -in Ońtústik túlekteri ielenedi degen boljam bar.
Naqty málimetti respýblikalyq Ulttyq testileý ortalyǵy aǵymdaǵy jyldyń 8 tamyzynan keiin jariialaityn bolady.
