Ońtústik Qazaqstan oblysynda «Rosatomnyń» shaǵyn sý elektr stantsiialaryn salý isi qolǵa alynady. Bul jobany «Shymkent» áleýmettik-kásipkerlik korporatsiiasy júzege asyrady, dep habarlaidy "Ult aqparat" QazAqparat agenttigine silteme jasap.
«Shymkent» ÁKK men «Rosatom Ortalyq Aziia» aimaqtyq ortalyǵy ózara túsinistik pen áriptestik kelisimine qol qoidy. Onyń maqsaty - Ońtústik Qazaqstan oblysynda shaǵyn sý elektr stantsiiasy men basqa da balamaly energiia salasyn damytý, sondai-aq, tabiǵat qoryn tiimdi paidalaný men saqtaý bolyp otyr. Qujatqa «Shymkent» ÁKK basqarma tóraǵasy Aitmuhammed Aldajarov pen «Rosatom Ortalyq Aziia» bas direktory Vitalii Dragýnov qol qoidy.
Taraptar Ońtústiktiń taýly aimaqtarynda qýatty 2MVt-qa deiingi, konteiner tiptes shaǵyn sý stantsiialaryn salýdyń pilottyq jobasyn birge qurmaq. Kelisilgen áriptestik boiynsha 2017 jyldyń qyrkúiek aiynyń ózinde mamandar stantsiialardy salýǵa jáne sý jinaý qurylǵysy men konteinerlerdi ornatýǵa qolaily oryndardy anyqtaý úshin alǵashqy tehnikalyq is-saparmen kelýdi josparlap otyr.
Konteinerdegi shaǵyn SES shyǵarýmen «Rosatom» memlekettik korporatsiiasy «Atomenergomash» kompaniiasynyń quramyna kiretin Vengriianyń Ganz Engineering and Energetics Machinery llc. (Ganz EEM) kompaniiasy ainalysady. Shaǵyn SES-terdi turǵyndary elektr jelisine qosylmaǵan aimaqtarda qoldanýǵa bolady. Shaǵyn SES týrbinasy jáne basqarý tetigi bar konteinerler jetkizilgen soń bir aidan keiin 1MVt-qa deiin elektr energiiasyn óndire alady. Aita keteiik, shaǵyn SES qashyqtyqtan, spýtnikalyq bailanys arqyly basqarylady. Qazir shaǵyn SES-terdi ózge elderge eksporttaý boiynsha kelissóz júrgizilýde.
Aita keteiik, Ońtústik Qazaqstan oblysynyń taý ózenderiniń mol áleýetin eskergen qos tarap alǵashqy joba aiaqtalǵan soń da ári qarai birge jumys istep, jergilikti ákimdikpen shaǵyn sý energetikasy salasyndaǵy basqa da jobalardy júzege asyrýǵa nietti.
