Ońtústik Qazaqstan oblysy ákimdiginde oblys ákiminiń birinshi orynbasary Darhan Satybaldynyń tóraǵalyǵymen «Nurly jer» baǵdarlamasyn iske asyrý boiynsha «Óńirlik úilestirý keńesiniń» alǵashqy otyrysy ótti. Jiynǵa oblys jáne qala ákimdiginiń ókilderi men salaǵa jaýapty basqarma basshylary, ekinshi deńgeili bank ókilderi, qurylys salýshy kompaniialar qatysty, dep habarlaidy "Ult aqparat" aimaq basshysynyń baspasóz qyzmetine silteme jasap.
Otyrysta sóz alǵan oblys ákiminiń birinshi orynbasary «Nurly jer» baǵdarlamasy aiasynda jeke qurylys salýshylardy turǵyn úi salýǵa shaqyryp, búginde qurylysyn bastaǵan birqatar kompaniialardyń usynǵan turǵyn úi jobalaryna ózgerister engizý qajettigin aitty.
Atalǵan baǵdarlama sheńberinde jeke qurylys salýshylar tarapynan usynysty yntalandyrý maqsatynda ekinshi deńgeili bankterge (EDB) nesie berý kólemderin keńeitý arqyly qurylys kompaniialaryn qarjy resýrstarymen qamtamasyz etý qaralǵan. Osy maqsatta jeke qurylys salýshylarǵa EDB beretin nesieler boiynsha syiaqy mólsherlemelerin sýbsidiialaý quraly engizilip otyr. Máselen, 2017 jyldan bastap, respýblikalyq biýdjetten jyl saiyn nesie berý mólsherlemesiniń 7%-ne deiin sýbsidiia bólinetin bolady jáne ol «Damý KDQ» AQ qarjy agenttigi arqyly beriledi.
Kredit berý úshin oń qorytyndy alǵan jeke qurylys salýshy baǵdarlamaǵa qatysýshy retinde «Óńirlik úilestirý keńesine» (ÓÚK) ótinish jasaidy. Keńestiń hattamasynyń negizinde EDB, jeke qurylys salýshy men «Damý KDQ» AQ arasynda úsh jaqty kelisim jasalady. Sonyń aiasynda sýbsidiia tóleý sharasy qamtamasyz etiledi.
