Ońtústik Qazaqstan oblysynyń ákimdigi men túrkiialyq «DOGUS» Constraction kompaniiasy arasynda «Ógem» ózeniniń sýyn burý maqsatynda yntymaqtastyq memorandýmy túzildi. Endi atalǵan sheteldik kompaniia ókilderi osy ýaǵdalastyq aiasynda tujyrymdama ázirlemek. Bul jumystar 2018 jyldyń qańtaryna deiin aiaqtalsa, odan keiin jobanyń tehnikalyq ekonomikalyq negizdemesi (TEN) men jobalaý-smetalyq qujattamasyn (JSQ) ázirleý jumystarynyń kezeńderi bastalady.
Bul týraly túrik kompaniiasynyń ókilderi oblys ákimi Janseiit Túimebaevtyń aldynda tanystyrylym jasap, «DOGUS» Constraction kompaniiasynyń Qazaqstandaǵy ókili Iýnýs Emre Sýdjý men oblys ákiminiń birinshi orynbasary Darhan Satybaldynyń arasynda atalǵan qujatqa qol qoiyldy.
Oblystyq energetika jáne turǵyn úi-kommýnaldyq sharýashylyǵy basqarmasy mamandarynyń málimetinshe, joba iske asqanda Ógem ózeninde gidrotehnikalyq imarat (soorýjenie) salynyp, odan úsh aýdanǵa - Saryaǵash, Maqtaaral jáne Qazyǵurtqa 3-3,5 m3/sek kólemde sý tartylady. Odan soń, tartylatyn sýaǵarlar (vodovod) boiynan kishi sý elektr stansalary boi kóterip, 51,7 MVt elektr qýaty alynady dep kútilýde.
Sonymen qatar, atalǵan joba iske asqan jaǵdaida, oblystyń Qazyǵurt, Saryaǵash jáne Maqtaral aýdandarynyń 400-ge jýyq eldi mekenindegi 700 myńnan asa turǵyn sapaly aýyz sýmen qamtamasyz etilip, aýyz sýǵa bailanysty másele tolyq sheshimin tabady.
Eske salaiyq, «Ógem» ózeni kórshiles Ózbekstannyń aýmaǵynda ishinara ornalasyp, transshekaralyq ózender qataryna jatqandyqtan, osy jyldyń aqpanynda Qazaqstan men Ózbekstan Respýblikalary Úkimetiniń birlesken jumys toby bas qosqan bolatyn. Onda qos eldiń ókilderi ekijaqty yntymaqtastyqty jetildirý máseleleri boiynsha otyrysynda «Ógem» ózeniniń sýyn burý kelisilgen bolatyn.
