Ońtústik Qazaqstanda jyl sońyna deiin oblystyq mańyzy bar alty avtomobil joly qaita qurý jáne kúrdeli jóndeý jumystarynan ótedi. Tiisti jumystardy bastaýǵa taiaýda oblystyq máslihattyń kezekti sessiiasynda depýtattardyń qoldaýymen qomaqty qarjy bólindi.
Atap aitqanda, osy jyldyń ekinshi jarty jyldyǵynda Sairam aýdanynyń ortalyǵy Aqsýkent pen Shymkent qalasyn qosatyn kúre tamyr jol - oblystyq mańyzy bar KH-97 «Aqsý-Qabylsai-qala qoqys orny» avtomobil jolynyń 10-18 shaqyrymy qaita qurý jumystarynan ótedi. Jobaǵa sáikes, qoldanystaǵy joldyń (7-9 m) eni 14 metrge keńeitilip, eki shetinen sýaǵar, jaryq shamdary jáne aiaqjoldar salynatyn bolady. Joldyń 14 shaqymyndaǵy («Elnur» toihanasynyń mańy) jer ústi temir jol ótpesiniń janynan ekinshi ótpe qurylysy júrgiziledi. Mundai qaita qurý jumystary Sairam turǵyn alaby men Shymkent qalasyn qosatyn oblystyq mańyzy bar KH-83 «Shymkent-Sairam-Qaramurt» avtomobil jolynyń 0-8 shaqyrymynda da júrgiziledi. Onda da qoldanystaǵy joldyń (7 m) eni 14 metrge keńeitilip, eki shetinen sýaǵar, jaryq shamdary jáne aiaqjoldar salynatyn bolady.
Bólingen qarjyǵa birqatar kóshelerge kúrdeli jóndeý jumystary júrgizilmek. Máselen, Sairam aýdanyndaǵy KH-82 «Shymkent-Lengir-Dostyq-Qasqasý-Kóksáiek-Sairam» avtomobil jolynyń 83,8-103,3 shaqyrymy men atalǵan aýdandaǵy KH-83 «Shymkent-Sairam-Qaramurt» avtomobil jolynyń 8-26,1 shaqyrymy kúrdeli jóndeý jumystarynan ótedi. Sonymen qatar, osy syndy sharýalar Tólebi aýdanyndaǵy KH-3 «Kóksáiek-Aqsý-Shaian-Myńbulaq-M32 r/j» avtomobil jolynyń 0-3 shaqyrymy men Qazyǵurt aýdanyndaǵy KH-85 «A-2 r/j-Aktas-Rabat-A-2 r/j» avtomobil jolynyń 0-30 shaqyrymdarynda jasalady dep kútilýde.
Aita ketý qajet, Qazyǵurttaǵy atalǵan jol «Batys Eýropa-Batys Qytai» halyqaralyq kólik dáliziniń «Shymkent-Tashkent» baǵytynyń 1 ýchaskesin salý kezinde ainalma jol qyzmetin atqaryp, joldyń jaǵdaiy jaramsyz kúige jetken-di. Jobaǵa sáikes qoldanystaǵy jolǵa kúrdeli jóndeý jumystary júrgizilip, eldi meken aýmaǵynda aiajoldar men jaryq shamdary salynatyn bolady.
