Ońtústik Qazaqstan oblysynda meshit imamy turǵyndarǵa terrorizmdi nasihattap kelgen, - dep habarlaidy Eýraziia birinshi arnasy.
Telearnanyń málimetinshe, 41 jastaǵy aýyl moldasy elimizde tyiym salynǵan dini uiymǵa qoldaý bildirip kelgen. Onyń Siriiada soǵysyp jatqan sodyrlarǵa kómek kórsetýge úndegen jáne din qyzmetkeri bul áreketin 6 jyldan beri júzege asyryp kelgeni aitylady.
Er adamnyń Sairam aýdany Qarabulaq aýylyndaǵy ortalyq meshittiń imamy ekeni belgili boldy.
Telearnanyń málimetinshe, imam ornynan bosatylyp, qamaýǵa alyndy.
"41 jastaǵy Abdýrapi Rahmatýllaev Qarabulaq aýylyndaǵy ortalyq meshitte 6 jyldan asa imam bolyp qyzmet etken. Halqy 30 myńnan asatyn eldi mekenniń meshitinde ait namazy kúnderi jamaǵattyń kóptiginen ine shanshar bos oryn bolmai qalady eken. Mine, osy jerde dúiim jurtty aýzyna qaratqan imam kópshilikke Siriiada soǵysyp júrgen sodyrlardy nasihattaǵan kórinedi. Olarǵa kómek kórsetip, qoldaý qajettigin aitypty. Alaida, bul týraly meshit qyzmetkerleri túsinik berýden úzildi-kesildi bas tartty", - deidi telearnadaǵylar.
"Biz imamǵa birdeme aitsaq, jala japqan bolamyz. Bizge aitýǵa bolmaidy. Biz aýylda bir-birimizdi tanimyz ǵoi. Endi ol týraly eshteme aita almaimyn", - dedi meshit qyzmetkerleriniń biri.
Aýyl imamynyń is-áreketi tártip saqshylaryn dúr silkindirdi. Osy jyldyń qańtarynda ol 2 aiǵa qamalyp, tergeý isi bastalyp ketken. Telearnanyń málimetinshe, keshe Sairam aýdandyq sotynda alǵashqy otyrys ótkizildi.
"Sottalýshy A.S. deitin azamatqa bailanysty QR QK 174-babynyń 1-bóligimen qozǵalǵan qylmystyq is Sairam aýdandyq sotynyń óndirisine kelip túsken. Qazirgi tańda, qylmystyq is qaralý barysynda. Ol boiynsha qabyldanǵan sheshimder qosymsha habarlanady", - dedi Sairam aýdandyq sotynyń keńse meńgerýshisi Sabyr Meirambaev.
Telearna málimetinshe, aýyl imamyna qatysty sot isi júrip jatyr. Onyń qylmysy dáleldenetin bolsa, zańǵa sáikes jaýapqa tartylýy múmkin. Jalpy jyl basynan beri Sairam aýdanynda lańkestik is-áreketti nasihattaǵany úshin 3 adamnyń sotty bolǵany aitylady. Al bul tórtinshi jaǵdai eken.
