Ońtústik Qazaqstan oblysy Saryaǵash aýdanynda Qazaqstan halqy Assambleiasy janyndaǵy Mediatsiia keńesiniń kóshpeli otyrysy ótti. «Mediatsiia institýtyn damytý jáne jańa ádisterdi engizý» taqyrybynda ótken jiynǵa oblystyq «Qoǵamdyq kelisim» KMM basshysy Erbol Baiqonaqov pen aýdandyq sottyń sýdialary, prokýratýra men ishki ister bóliminiń ókilderi qatysty, dep habarlaidy QazAqparat tilshisi.
Jiynǵa kásibi jáne kásibi emes mediatorlar, aýdan, aýyl ákimdikteriniń mediatsiia salasyna jaýapty qyzmetkerleri de arnaiy shaqyryldy. Basqosýda sóz alǵan oblystyq «Qoǵamdyq kelisim» KMM janyndaǵy mediatsiia kabinetiniń meńgerýshisi Hasan Batsiev óńirimizde mediatsiia jelisin damytý baǵytynda atqarylyp jatqan jumystarǵa toqtaldy.
«Elbasy Qazaqstan halqy Assambleiasynyń XXIV sessiiasynda mediatsiia jelisin damytýdy assambleiaǵa júktegen bolatyn. Bul baǵytta Ońtústik Qazaqstan oblystyq «Qoǵamdyq kelisim» mekemesinde ashylǵan mediatsiia kabinetinde 600-ge jýyq azamatqa quqyqtyq kómek kórsetildi. Oblystaǵy 4 mediatsiia ortalyǵymen áriptestik bailanys ornatyp, óńirde qyzmet atqaratyn 44 kásibi, 546 kásibi emes mediatorlardyń derekqory túzildi. Óńirdegi mediatorlardyń yqpalymen byltyrǵy jyly 4 myńnan astam is boiynsha taraptar ortaq mámilege kelse, biylǵy jyldyń 8 aiynda 3207 is sotqa deiingi tártippen sheshildi», - dedi Hasan Batsiev.
Keńeste Saryaǵash aýdandyq sotynyń sýdiasy men «Mediatsiia jáne quqyq» ortalyǵynyń basshysy, kásibi mediator Elmira Esimbetova, sondai-aq kásibi emes mediator Jahan Beisenbekov pen Derbisek aýyldyq okrýginiń ákimi sóz sóiledi. Jiynǵa qatysýshylar daýlasýshy taraptardy bitimgershilikke bastaityn mediatsiia institýtyn damytý jaily oi-pikirlerin ortaǵa saldy. Oblystyq «Qoǵamdyq kelisim» KMM basshysy Erbol Baiqonaqov keńesti qorytyndylap, otyrysta aitylǵan usynys-pikirlerdiń barlyǵy eskeriletinin atap ótti.
