Qytailyq kásipkerler Ońtústik Qazaqstan oblysynda bioetanol óndirý zaýyty men fosfor óndirisiniń qaldyqtaryn qaita óńdeýden ótkizetin óndiris oshaǵyn iske qospaqshy.
Kórshi eldiń investorlary bioetanol óndirisine Otyrar aýdanyn, al fosfor qaldyqtaryn óńdeýde Sozaq óńirin qolaily kórip otyr. Búgin bul týraly Ońtústik Qazaqstan oblysynyń ákimi men Qytai ftorselikondyq óndirisi qaýymdastyǵynyń direktory Sianjýn Tsao bastaǵan delegatsiianyń kezdesýinde málim boldy, dep habarlaidy «QazAqparat HAA tilshisi.
Kezdesýde qytailyq delegatsiiany bastap kelgen Sianjýn Tsao negizgi eki baǵytta zaýyt qurylysyn bastaýǵa múddeli ekendikterin jetkizdi.
«Biz Ońtústik Qazaqstan oblysynda negizgi eki baǵytty damytýdy josparlap otyrmyz. Onyń biri - bioetanol óndirý isi, al ekinshisi fosfor qaldyqtaryn qaita óńdeýden ótkizý. Eger ekijaqty kelisimder oryndalyp jatsa, eki zaýyttyń qurylysyn tez arada bastaýdy jón kórip otyrmyz», - dedi ol.
Óz kezeginde óńir basshysy Janseiit Túimebaev sheteldik investorlarǵa oblystyń investitsiialyq tartymdylyǵy men indýstrialdy-innovatsiialyq jobalardy iske asyratyn aimaqtardyń áleýetin baiandady. Oblys ekonomikasyn órge súirep kele jatqan salalarǵa toqtalǵan ákim investitsiia tartý boiynsha jergilikti bilik tarapynan kórsetiletin jeńildikter men múmkindikterge keńinen toqtaldy.
«Elge investitsiia tartý - ekonomikanyń eń negizgi tetigi. Osyny eskere otyryp biz kásipkerlerge barynsha qoldaý bildirip otyrmyz. Óńirimizde 11 indýstriialyq 1 arnaiy ekonomikalyq aimaǵymyz jumys isteidi. Sheteldik investorlar kedendik, múliktik salyqtardan bosatylady. Sondai-aq jer telimi, infraqurylymdyq qajettilikterdiń bárimen tolyq qamtamasyz etetin bolamyz», - dedi Janseiit Qanseiituly.
Sheteldik investorlardyń eki jobasyna da qoldaý bildirgen oblys ákimi tiisti basqarma basshylaryna naqty tapsyrmalar júktedi. Tiisti qujattardy tezdetip ázirlep, qajetti jer telimderin bólýdi jáne de eki zaýyttyń da irgetasyn biyl qalaýdy tapsyrdy.
Aita keteiik, búgingi tańda álemde bioetanol óndirisiniń órisi keńip, paidalanýshylar qatary artyp keledi. Ǵylym tilimen aitsaq, bioetanol degenimiz tehnikalyq absoliýttendirilgen spirt quramy 99,9 gradýsty quraidy. Atalmysh jańa otyn túri janar-jaǵar maiǵa qaraǵanda, aýany lastamaidy jáne parniktik gazdardy da bólmeidi. Bir sózben aitqanda adamzat balasyna da, qorshaǵan ortaǵa da ziiansyz otyn. Qytailyq investorlar bioetanol óndirý isinde ońtústikqazaqstandyq júgeri men bidai, arpa qaldyqtaryn paidalanbaq. Bul óz kezeginde Ońtústik Qazaqstan oblysynyń aýyl sharýashylyq salasyn damytýdyń erekshe joly bolǵaly otyr.
