Ońtústik Qazaqstan oblysynda 2018 jyly jańa sipattaǵy ataýly áleýmettik kómek 300 myńǵa jýyq adamdy qamtidy dep josparlanyp otyr.
Keler jyly jumsalatyn qarjy kólemi úsh esege ósip, 18 mlrd teńgeni quramaq, dep habarlaidy OQO ákiminiń baspasóz qyzmeti.
Óńirde áleýmettik kómektiń jańa sipatyna kóshý úshin tiisti sharalar qyzý júzege asyrylýda. Jobany jergilikti halyqqa túsindirýde aqparattyq-nasihat jumystary júrgizilip, oǵan arnaiy 36 mobildi top quryldy. Búginge deiin 700-den astam eldi mekende turǵylyqty halyqpen kezdesýler uiymdastyryldy.
Oblystyq jumyspen qamtýdy úilestirý jáne áleýmettik baǵdarlamalar basqarmasynda kún saiyn mamandarǵa osynaý tyń júieni túsindirý maqsatynda oqý seminarlary ótýde. Budan bólek, jumyspen qamtý ortalyqtary men áleýmettik baǵdarlamalar bólimderi mamandaryna, aýdan jáne aýyldyq okrýg ákimderine ár toqsan saiyn oqý seminarlary uiymdastyrylýda. Osyǵan deiin óńirdegi 9 aýdannyń mamandary osynaý sharalarǵa qatysyp biliktiligin arttyrǵan. Bul joly Sairam, Saryǵash aýdandaryna kelgen 60 shaqty maman jańasha ataýly kómek kórsetý júiesimen jiti tanysty. Qoiylǵan suraqtarǵa jaýap berip, bilgen-túigenderin pysyqtady. Kezdesý kezinde 2018 jyldyń 1 qańtarynan iske asatyn jańa formattaǵy ataýly áleýmettik kómek kórsetý tártibiniń ózgerýi túsindirildi.
Aita keteiik, «Órleý» jobasy aiasynda búginge deiin jalpy somasy 6 mlrd-tan astam teńge bolatyn shartty aqshalai kómekti 20 myńnan astam ońtústikqazaqstandyq aldy. Osy jobaǵa qatysýshylardyń 94%-y jumyspen qamtýdyń belsendi sharalarymen, 85%-y turaqty jumyspen qamtyldy. Aǵymdaǵy jyldyń 9 aiynda «Órleý» jobasyna qatysýshylardyń qatarynda 906 adam óz isin ashyp, jeke kásipker retinde salyq organdaryna tirkeldi. Oblysta «Órleý» pilottyq jobasyn iske asyrý nátijesinde, shartty aqshalai kómek alýshylardyń tabysy 4,2 esege artyp, orta eseppen aiyna 1 adamǵa 23 myń teńgege jetip otyr.
