Biylǵy segiz aida «OŃTÚSTIK» aimaqtyq investitsiialyq ortalyǵy men «Yrys» mikro qarjy uiymy birlese 5 868,5 mln teńgeni quraityn 2 096 jobaǵa nesie bergen. Bul týraly búgin OQO óńirlik kommýnikatsiialar qyzmetinde ótken baspasóz konferentsiiasynda «Ońtústik» aimaqtyq investitsiialyq ortalyǵynyń basqarma tóraǵasy Qýanysh Baitóre málimdedi, dep habarlaidy "Ult aqparat" oblys ákiminiń baspasóz qyzmetine silteme jasap.
Tóraǵanyń málimeti boiynsha, qarjylandyrǵan jobalar sany ótken jyldyń tiisti kezeńimen salystyrǵanda 43,5 paiyzǵa artqan. Al qarjylandyrý somasy 20,5 paiyzǵa kóbeiip otyr. Al 2017 jyly qarjylandyrylǵan eń kóp joba Maqtaaral aýdanynda bolyp otyr. Iaǵni, 1 mlrd teńgeden astam somany quraityn 443 joba qarjylai qoldaý tapqan.
«2009-2017 jyldar aralyǵynda qarjylandyrylǵan jobalar kelesi basym baǵyttar aiasynda júzege asyryldy. Atap aitsaq, indýstriialandyrý kartasyna engen 36 joba 7 697,2 mln. teńgege qarjylandyrylsa, mal sharýashylyǵy baǵytynda 22 957,3 mln teńgege 10 186 joba, dala jumystary boiynsha 6 075,9 mln teńgege - 5 098 joba, al aýyl sharýashylyǵy ónimderin qaita óńdeýge 1 559,2 mln teńgege 55 joba jáne taǵy da basqa túrli baǵyttar qarjylandyrylǵan»,- dedi Qýanysh Baitóre.
Búginde «OŃTÚSTIK» AIO-nyń nesie qorjyny 12 665 mln teńgege jetti, al «Yrys» MQU nesie qorjynynyń kólemi 10 664,0 mln teńgeni qurap otyr. Investitsiialyq ortalyqpen qarjylandyrylǵan jobalardyń 34 paiyzy óndiristik baǵytta bolsa, mikro qarjy uiymynyń nesie qorjynynyń 65 paiyzy mal sharýashylyǵyna baǵyttalǵan.
