Ońtústik Qazaqstan oblysy Sairam aýdanynda jylyna 4 myń komplekt jihaz shyraýǵa qaýqarly jańa fabrika iske qosyldy, dep habarlaidy oblys ákiminiń baspasóz qyzmeti.
Quny 506 mln teńge bolatyn jobanyń 300 mln teńgesin kásipker «Biznestiń jol kartasy-2020» baǵdarlamasy aiasynda alǵan. Munda 70 adam turaqty jumyspen qamtylyp otyr.
Fabrikanyń jumysymen tanysqan oblys ákimi J.Túimebaev shaǵyn jáne orta kásipkerlikti damytý, bul el ekonomikasynyń damýynyń kepili ekenin aitty.
«Jalpy ónerkásipti damytý Elbasymyzdyń bizdiń aldymyzǵa qoiǵan mindetiniń biri. Búgin mine, Sairam aýdanynda qanshama turǵyndy jumyspen qamtyp otyrǵan jańa kásiporyn ashylyp otyr. Sonymen qatar, fabrikanyń ashylýymen aýdannyń óńdeý ónerkásibindegi úlesi artatyn bolady. Sizder óz sózderińizde fabrikanyń ónimi Italiia jihazdarynan kem bolmaidy dedińizder. Budan bylai jurt «Sairam sapasy» degen termindi qoldanatyndai dárejege jetińizder», - degen ákim kásiporynnyń jumysshylaryna sáttilik tiledi.
Mundaǵy ónimniń sapasy joǵary sapaly nemis jáne italiialyq jabdyqtar men zamanaýi materialdardy paidalaný arqyly qamtamasyz etiledi. Sondai-aq, fabrika ónimderi sapa menedjmenti men ekologiialyq taza degen sertifikatpen rastalǵan. Budan bólek, óndiris orny Italiia dizainerlerdiń qatysýymen ekologiialyq taza materialdardy jáne senimdi komponentterdi paidalana otyryp, tutynýshyǵa tek joǵary sapaly jihaz usynbaq.
«Bella Mebel» taýar belgisimen shyǵatyn fabrikanyń ónimderin aldaǵy ýaqytta elimizdiń barlyq aimaqtaryndaǵy jihaz dúkenderinen satyp alýǵa bolady.
Jalpy Sairam aýdanyndaǵy ónerkásip qurylymynyń 86 paiyzyn óńdeý ónerkásibi qurasa, onyń ishinde jihaz shyǵarý salasyndaǵy úlesi 1 paiyzdy ǵana quraityn. Osy rette, aýdanda ashylyp otyrǵan jihaz shyǵaratyn fabrika ónim kólemin 600 mln teńgege deiin arttyryp, óńdeý ónerkásibindegi úlesi 3 paiyzǵa deiin artpaq.
