Ońtústik Qazaqstan oblysynda bos jatqan aýyl sharýashylyǵy maqsatyndaǵy jerlerdi memleketke qaitarý jumystary jalǵasýda. Bul másele oblys ákiminiń orynbasary Erbol Sadyrdyń tóraǵalyǵymen ótken keńeste keńinen talqylanyp ótti, dep habarlaidy "Ult aqparat".
Aýdan, qala ákimderiniń salalyq orynbasarlary men jer qatynastary salasyna jaýapty bólim basshylarynyń qatysýymen ótken jiynda jer qatynastaryn damytý máseleleri sóz boldy. Oblystyq jer qatynastary basqarmasynyń bólim basshysy Qarsybek Ertýov aǵymdaǵy jyldyń sońyna deiin oblys boiynsha 106 131 jer paidalanýshynyń aýyl sharýashylyǵy maqsatyndaǵy jerlerine jáne 842 eldi mekenniń 811,8 myń ga jerine qujattamalyq reviziia jumystaryn júrgizý jáne aýdan, qala ákimdikterimen jaiylymdardy basqarý, olardy paidalaný jónindegi jospardy jergilikti ókildi organdarmen bekitý jumystary júrgizilip jatqanyn atap ótti.
Bul baǵytta birqatar aýdan, qala ákimdikteri tarapynan atqarylmai otyrǵan jumystarǵa toqtaldy. Onyń sózinshe biylǵy jyly óńirde 467 jer paidalanýshynyń 63,8 myń ga paidalanylmai jatqan aýyl sharýashylyǵy maqsatyndaǵy jer ýchaskeleri memleket menshigine qaitarylǵan. Sonymen qatar oblys aýmaǵyndaǵy qubyrlardyń qorǵaý jáne qaýipsizdik aimaqtary shegindegi jer ýchaskelerin paidalaný máseleleri boiynsha is-sharalar josparynyń oryndalýy barysyna taldaý jasalyp, birqatar aýdan, qala ákimdikterimen atqarylýy tiis jumystar atqarylǵan.
Óz kezeginde oblys ákiminiń orynbasary Erbol Sadyr barlyq aýdan, qala ákimdikterine jer qoryna qujattamalyq reviziia júrgizý, aýyl sharýashylyǵy jerlerine túgendeý jumystaryn jalǵastyrý jáne qubyrlardyń qorǵaý aimaqtaryna túsken qurylystardy kóshirý boiynsha naqty tapsyrmalar berdi.
