Ońtústik Qazaqstan oblysynda aýylǵa barǵan dárigerlerge 1 million teńgeden beriledi. Bul týraly búgin OQO Óńirlik kommýnikatsiialar qyzmetinde ótken baspasóz máslihatynda Densaýlyq saqtaý basqarmasynyń basshysy Muqan Egizbaev málim etti. Oblystyń bas dárigeriniń sózinshe oblys basshylyǵy jas mamandarǵa kóp jaǵdai jasap, qarjy kólemin kóbeitti, dep habarlaidy QazAqparat tilshisi.
«Buǵan deiin aýyldy jerlerge barǵan dárigerlerge 100 myń teńgeden bir rettik kómek berilip keldi. Alaida bul másele oblys ákimi Janseiit Qanseiitulynyń qoldaýymen qaita qaralyp, oblystyq máslihattyń sheshimimen beriletin qarjy kólemi ulǵaityldy. Aýyldy jerlerde dárigerler tapshylyǵyn tómendetý maqsatynda onda joldanatyn mamandardyń áleýmettiń kómek paketine ózgerister engizildi. 2018 jyldyń qańtar aiynan bastap aýyldyq jerge joldanatyn jas mamandar bir rettik 1 million teńge kómek alatyn bolady», - dedi Muqan Keńesbekuly.
Basqarma basshysynyń sózinshe, 1 mln teńge dárigerlerge Ońtústik Qazaqstan oblysynda ǵana beriledi. Biraq kelisim boiynsha aýyldy jerlerge jumysqa baratyn mamandarǵa bes jyl qyzmet etý mindetteledi. Buǵan deiin bul merzim úsh jyl bolatyn.
Sondai-aq, oblystyń densaýlyq saqtaý salasynda keshendi meditsinalyq aqparattyq júie engizilýde. Bul maqsatta 8 582 kompiýterlik tehnika satyp alynǵan. Jyl sońyna deiin oblystyń barlyq meditsinalyq uiymdarynyń jumysy 100% kompiýterge kóshedi dep josparlanyp otyr. Biryńǵai server meditsinalyq uiymdaryn patsient týraly elektrondyq aqparat almasý úshin bailanystyrady. «Jinaq aqparat avtomattandyrylǵan túrde jergilikti atqarýshy organdardaǵy sitýatsiialyq ortalyqta túsedi. Qaǵaz túrindegi qujat ainalymy azaiady, bul óz kezeginde patsientterdiń meditsinalyq uiymdary arasynda bos júrýi edáýir qysqarady», - deidi Muqan Egbizbaev. Osylaisha ońtústik turǵyndary elimizde alǵashqy bolyp elektrondyq densaýlyq pasporttaryn almaqshy.
