Búgin Ońtústik Qazaqstan oblysynda «Jergilikti ózin ózi basqarýdyń derbes biýdjetin engizý» taqyrybynda respýblikalyq forým óz jumysyn bastady, dep habarlaidy "Ult aqparat" aimaq basshysynyń baspasóz qyzmetine silteme jasap.
Forým jumysyna oblys ákimi J.Túimebaev, Ulttyq ekonomika vitse-ministri Aibatyr Jumaǵulov, QR Qarjy vitse-ministri Berik Sholpanqulov, BUUDB Qazaqstandaǵy turaqty ókiliniń orynbasary Mýnhtýia Altangerel men sarapshylar jáne saiasatkerler, Almaty, Jambyl, Qyzylorda men Ońtústik Qazaqstan oblystarynyń aýyl ákimderi jalpy sany 400-den astam adam qatysýda.
Memleket basshysy N.Nazarbaev «100 naqty qadam» Ult josparynyń 98-qadamy sheńberinde aýdandyq mańyzy bar qala, aýyl, kent jáne aýyldyq okrýg deńgeiinde jergilikti ózin-ózi basqarýdyń derbes biýdjetin engizýdi tapsyrǵan bolatyn.
Elimizdegi aýyl ákimderiniń basyn qosqan jiynnyń ashylýynda sóz alǵan oblys ákimi J.Túimebaev osyndai aýqymdy forýmdy uiymdastyrǵan Qazaqstan Respýblikasynyń Ulttyq ekonomika jáne Qarjy ministrlikteri men Birikken Ulttar Uiymynyń ókilderine alǵys aitty.
«Aýyl ákimderiniń rólin kúsheitý boiynsha jumys jalǵasýda. Memleket basshysy Nursultan Ábishuly Nazarbaev Qazaqstan halqyna «Áleýmettik-ekonomikalyq jańǵyrtý - Qazaqstan damýynyń basty baǵyty» Joldaýynda jergilikti ózin-ózi basqarýdy damytý, jergilikti mańyzy bar barlyq máselelerdi sheshýge azamattardyń qatysýyn keńeitý qajettigin atap ótken edi. Búginde oblysta derbes biýdjetke kóshý úshin jan-jaqty daiyndyq jumystar atqaryldy. Aimaqta salyq salý bazasyn naqtylaý maqsatynda memlekettik derekqorlar týraly málimetter salystyryp, jańartyldy. Jyljymaityn múlik boiynsha tirkelmegen nysandardyń ielerin ádilet organdaryna tirkeý iske asyryldy. Bul aýyldyq okrýgterdiń tabysyn arttyrady»,-dedi ákim.
Ońtústik Qazaqstan oblysynda 2018 jyldan bastap derbes biýdjet 2 000 adamnan turatyn 175 ákimshilik birlikte, 2020 jyldan bastap qalǵan altaýyna engiziletin (barlyǵy 181) bolady.
Jiynda sóz alǵan QR Ulttyq ekonomika vitse-ministri A.Jumaǵulov jergilikti ózin ózi basqarýdyń derbes biýdjetin engizgennen keiin jergilikti turǵyndar qarjynyń jumsalýyn qadaǵalai alatynyn atap ótti.
"Zańda turǵyndardyń biýdjettik qarajattyń jumsalýyn jergilikti qoǵamdastyqtyń jinalysyna qatysýshylardan turatyn komissiia arqyly aýyldyq okrýgtiń biýdjetiniń oryndalýy monitoringin júrgizý jolymen baqylaý tetigi kózdelip otyr.
Osylaisha jergilikti qoǵamdastyqtyń múddesin esepke alý arqyly biýdjetti josparlaýǵa jáne baqylaýǵa múmkindik beretin tetikter qarastyryldy», - dedi Jumaǵulov.
Aita keteiik, Qazaqstan Respýblikasynyń Ulttyq ekonomika ministrligi «Zerde» oqý ortalyǵymen birlesip, aýyldyq okrýg ákimderimen arnaiy oqý kýrsyn uiymdastyrdy. Sonymen qatar, aqparattyq-túsindirý toby aýdandarǵa baryp derbes biýdjetti jáne kommýnaldyq menshikti engizý máseleleri boiynsha seminarlar ótkizdi. Al oblystyq memlekettik qyzmetshilerdi daiarlaý ortalyǵynyń bazasynda eki myń adamnan astam aýyldyq okrýg ákimderi, sondai-aq ekonomika jáne qarjy bólimderiniń qyzmetkerleri oqytylǵan.
