Ońtústik Qazaqstan oblysy Sairam aýdanyndaǵy Qarabulaq aýylynda aýyl jastarynyń forýmy ótti. «Tárbie otbasynan bastalady» taqyrybymen ótken jiynǵa 600-den astam jastar qatysty , dep habarlaidy "Ult aqparat".
Oblystyq Qazaqstan halqy assambleiasynyń uiymdastyrǵan jiynda Elbasy Nursultan Nazarbaevtyń «Bolashaqqa baǵdar: rýhani jańǵyrý» maqalasyn nasihattaý jáne túsindirý, sonymen birge ony júzege asyrý jáne qazirgi jahandyq ózgerister jaǵdaiyndaǵy qazaqstandyq patriotizmdi qalyptastyrý máseleleri sóz boldy. Forýmdy ashyp, júrgizip otyrǵan Sairam aýdanynyń ákimi Baqtiiar Mamaev óz sózinde Elbasynyń baǵdarlamalyq maqalasynda aitylǵan maqsat-mindetterge toqtalyp, ony iske asyrýda jastarǵa artylar jaýapkershilik jaiyn sóz etti. Al oblystyq Qazaqstan halqy Assambleiasy tóraǵasynyń orynbasary Muratáli Qalmuratov eldiń birligi men yntymaǵyn saqtap, etnosaralyq tatýlyqty nyǵaitýdyń mańyzdylyǵyna toqtaldy.
«Eldiń birligi, tatýlyǵy men tynyshtyǵynyń nátijesinde búgingi tańdaǵy tabystarǵa jetip, eldigimizdi nyǵaityp kelemiz. Endeshe, el birligi keiingi býynǵa amanattar eń basty bailyǵymyz bolýy kerek. Ol úshin osynaý jalpy ulttyq qundylyqtar jaily áńgime ár otbasyda, dastarhan basynda aitylýy tiis», - dedi Muratáli Orazalyuly.
Forýmda sonymen qatar Qazaqstan ózbekteri «Dýstlik» qaýymdastyǵynyń tóraǵasy Ikromjan Hashimjanov pen oblystyq bilim men jumyspen qamtýdy úilestirý jáne áleýmettik baǵdarlamalar basqarmalarynyń, oblystyq din máselelerin zertteý ortalyǵy men jastar resýrstyq ortalyǵynyń basshylary sóz sóiledi. Erkin formatta ótken jiyn barysynda jastar din, jastar saiasaty, jumyspen qamtý, bilim salasyna qatysty ózderiniń kókeilerinde júrgen saýaldaryn qoiyp, sala mamandarynan tushymdy jaýaptar aldy. Qatysýshylar forým sońynda jastarǵa arnap ózara dostyq pen yntymaqty saqtaý, nyǵaitý jóninde úndeý jariialady.
