OQO-da aýyl turǵyndaryna 15 mamandyq boiynsha kásibi bilim beriledi. Bul másele ákimdiktiń kezekti selektorlyq jiynynda kóterildi, dep habarlaidy oblys ákiminiń baspasóz qyzmeti.
Jiynda sóz alǵan oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy M.Otarshiev oblysta osy jyly 53,7 myń jańa jumys oryndary ashylǵanyn, onyń ishinde turaqty jumys oryndary 38 413 ekenin atap ótti.
Onyń aitýynsha, mamandar tapshylyǵyn retteý maqsatynda «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan» baǵdarlamasynyń birinshi baǵyty sheńberinde óńirde 4 584 adam tehnikalyq jáne kásiptik bilim alyp jatsa, qysqa merzimdi kásiptik oqýǵa 9 682 adam 89 mamandyq boiynsha joldandy.
Baiandamashyny tyńdaǵan ákim basqarma basshysyna 15 mamandyq boiynsha qajettiligine sai, aýyl turǵyndaryn oqytyp, kásipke beiimdeýdi aitty. Aldymen, aýyldyq okrýg deńgeiinde atqarylatyn jumystar, odan soń aýdandyq dárejede júzege asyrylýy tiis dedi.
«Atalǵan 15 mamandyq boiynsha, iaǵni, tokar, temir ustasy, aǵash ustasy, elektrshi, santehnik, shashtaraz syndy mamandyqtarǵa beiim azamattardy aýyl ákimderi taýyp berýi kerek. Bul joba naqty júzege asqanda azamattar jumyspen qamtylyp, aýyldaǵy ómir súrý jaǵdaiy qala órkenietine beiimdeler edi. Osylaisha, aýyldaǵy turmys-tirshilikti jaqsartý arqyly oblystyń deńgeiin kóteretin bolamyz», - dedi J.Túimebaev.
Aýyl turǵyndarynyń kásibi mamandanýynan bólek, turǵyndardyń salaýatty ómir saltyn qalyptastyrý jaiynda nazardan tys qaldyrmaǵan aimaq basshysy árbir aýdan ortalyǵy men aýyldyq okrýgterde angar tipti sport alańshalaryn salý qajettigin aitty. Sondai-aq, ol modýldi sport keshenderiniń qurylys jumystary Elbasynyń «Bolashaqqa baǵdar:rýhani jańǵyrý» baǵdarlamalyq maqalasynda aitylǵan «Týǵan jerge taǵzym» aiasynda el azamattaryn shaqyrý arqyly júrgizý kerektigin eske saldy.
Jalpy Ońtústik Qazaqstan oblysynda buqaralyq sportty damytý maqsatynda aimaqtaǵy eldi mekender men kóp qabatty úilerdiń aýlalarynda jyl basynan beri 57 sport alańshalary paidalanýǵa berilse, onyń 20-sy demeýshiler esebinen salynǵan.
