Búgin Shymkent qalasynda múmkindigi shekteýli jandar kúni qarsańynda №1 arnaýly áleýmettik qyzmetter kórsetý ortalyǵynyń qosymsha 110 oryndyq ǵimaraty paidalanýǵa berildi, dep habarlaidy oblys ákiminiń baspasóz qyzmeti.
Ashylý saltanatyna oblys ákimi J.Túimebaev arnaiy qatysyp, mekemege teledidar syiǵa tartý etti. Óńir basshysy erekshe kútimdi qajet etetin jandarǵa áleýmettik qoldaý kórsetý úshin jyl saiyn jergilikti biýdjetten 9 mlrd teńge kóleminde qarjy bólinetindigin aitty.
«Jyldan jylǵa múmkinshiligi shekteýli jandarǵa degen qoǵamnyń kózqarasy ózgerip, olardy qoǵamnyń bir múshesi retinde qabyldap keledi. Úkimetimizdiń múmkindigi shekteýli jandarǵa arnalǵan kedergisiz keńistik sharalary aiasynda atqarǵan sharalary da az emes. Osy jyly zamanaýi úlgide salynǵan múmkindigi shekteýli balalarǵa arnalǵan kúndizgi qatynaý bólimshesi ashyldy. Onda, 32 múmkindigi shekteýli balalar arnaýly áleýmettik qyzmetpen qamtylýda. Sonymen qatar, múmkindigi shekteýli azamattarǵa qoljetimdi orta qurý maqsatynda biyl 219 nysan beiimdeldi. Budan bólek, 8 myńnan astam azamat shipajai joldamasymen, 2 myńǵa jýyq qolarbamen, 40 myń adam tehnikalyq kómekshi jáne gigienalyq quraldarmen, 9 myńǵa jýyq azamat arnaýly áleýmettik qyzmettermen qamtylǵan», - dedi ákim.
Búgingi ashylǵan ortalyqta 18 jastan asqan psihonevrologiialyq aýrýlary bar I jáne II top múmkindigi shekteýli azamattar arnaýly áleýmettik qyzmettermen qamtamasyz etiledi. Úsh qabatty ǵimaratta dáriger kabineti men stamatolog, ginekolog dárigerleriniń kabinetteri men kezekshi medbikeler beketi, tynyǵý bólmesi, em qabyldaý bólmesi bar.
Osy kúni J.Túimebaev dendro saiabaqta «Múmkindigi shekteýli azamattar kúnine» arnalǵan saltanatty sharaǵa qatysty. Onda ákim múmkindigi shekteýli jandar jasaǵan qolóner buiymdarynyń kórmesin tamashalap, arnaýly ortalyqtardyń emdelýshileri men oblystyq filarmoniia ánshileri usynǵan kontserttik baǵdarlamany kórdi.
Búgingi tańda oblysta múmkindigi shekteýli azamattardyń sany 119 myń adamdy quraidy. Onyń 15 myńnan astamy sozylmaly júike aýrýlaryna shaldyqqan jandar. Búginde osy sanattaǵy jasy 18-den asqan múgedektiń 1268-i basqarmaǵa qarasty tórt eresekterge arnalǵan arnaýly áleýmettik qyzmetter kórsetetin Ortalyqtarda tolyǵymen memleket qamqorlyǵyna alynyp, keshendi qyzmettermen qamtylýda.
Joǵaryda atalǵan múmkindigi shekteýli jandardyń 40 myńǵa jýyǵy eńbekke qabiletti azamattar. Osy rette, eńbek jaramdy turǵyndardy jumyspen qamtý maqsatynda bos oryndar jármeńkesi uiymdastyrylyp keledi. Nátijesinde 526 adam turaqty jumysqa ornalastyrylsa, 633 adam ýaqytsha jumysqa joldandy. Al 226 múmkindigi shekteýli azamat qaita daiarlaý qysqa merzimdik kásiptik oqýǵa jiberildi.
